தடைகளைத் தகர்த்து தாய்நாட்டுக்கு பெருமை சேர்த்த துளசிமதி!

காஞ்சிபுரம்: “மாற்றுத் திறனாளியான உங்களுக்கு விளையாட்டால் என்ன பயன்?” என்று அலட்சியமாக கேட்டவர்களை வியப்பில் ஆழ்த்தும் வகையில் பாராலிம்பிக் பேட்மிண்டன் போட்டியில் இந்தியாவுக்காக வெள்ளிப் பதக்கம் வென்று சாதனை படைத்துள்ளார் காஞ்சிபுரத்தைச் சேர்ந்த மாணவி துளசிமதி.

காஞ்சிபுரம் – பழைய ரயில்வே ரோடு பகுதியை சேர்ந்த முருகேசன் மகள் துளசிமதி (24). கால்நடை மருத்துவம் படித்து வருகிறார். உடல் உறுப்புகளை இழந்த துளசிமதிக்கு சிறுவயதில் இருந்தே பேட்மிண்டனில் ஆர்வம் இருந்தது.

இவரது தந்தை முருகேசன் விளையாட்டு பயிற்சியாளர். தனது மகளுக்கு பேட்மிண்டனில் ஆர்வம் இருப்பதை அறிந்து அவளுக்கு அதில் பயிற்சி அளித்தார். மகளின் பள்ளிப் படிப்பை முடிக்கும் வரை அவர்தான் பயிற்சியாளராக இருந்தார். பின்னர் சிறப்புப் பயிற்சி தேவை என்ற காரணத்தால் துளசிமதி ஹைதராபாத் சென்று பூப்பந்து விளையாட்டில் முறையான பயிற்சி பெற்றார்.

அங்கு அவருக்கு பயிற்சி அளித்தவர் முகமது இர்பான் என்ற தமிழர். துளசிமதி ஏற்கனவே பல்வேறு ஆசிய அளவிலான விளையாட்டுகளில் பங்கேற்றுள்ளார்.

2023-ம் ஆண்டு சீனாவின் காங்சு நகரில் நடைபெற்ற ஆசிய விளையாட்டுப் போட்டியில் பங்கேற்று தங்கம், வெள்ளி, வெண்கலம் என மூன்று பதக்கங்களை வென்றார். அதேபோல் பாட்மிண்டனில் இரட்டையர் மற்றும் ஒற்றையர் பிரிவில் 15-க்கும் மேற்பட்ட பதக்கங்களை வென்றுள்ளார்.

பல்வேறு ஆசிய மற்றும் சர்வதேச போட்டிகளில் பதக்கம் வென்றுள்ளார். இம்முறை பாரிசில் நடந்த பாராலிம்பிக் போட்டியில் பேட்மிண்டன் ஒற்றையர் பிரிவில் துளசிமதி பங்கேற்றார். அனைத்து நிலைகளிலும் வெற்றி பெற்று இறுதிப் போட்டிக்கு முன்னேறினார்.

இறுதிப் போட்டியில் வெள்ளிப் பதக்கம் வென்றார். துளசிமதியின் தந்தை முருகேசன் கூறுகையில், “துளசிமதிக்கு சிறுவயதில் இருந்தே விளையாட்டில் ஆர்வம் உண்டு. மாற்றுத்திறனாளியாக இருந்தாலும் பயிற்சி அளித்தேன். தேவையில்லாத வேலை என பலர் கூறினர்.

ஆனால், அதையெல்லாம் மீறி அவரை இந்த நிலைக்கு கொண்டு வந்தோம். அவர் இந்த இடத்தை அடைவதைத் தடுக்க பல்வேறு தடைகளை ஏற்படுத்தினார்கள். பாராலிம்பிக் வெற்றி குறித்து துளசிமதி கூறுகையில், “இந்தப் போட்டியில் சீனாவின் யங்கை தோற்கடித்து தங்கம் வெல்வதே குறிக்கோளாக இருந்தது.

இம்முறை அது முடியாமல் போனாலும், அடுத்த பாராலிம்பிக்கில் நிச்சயம் தங்கம் வெல்வேன். பாராலிம்பிக்ஸ் மட்டுமல்ல, ஆசிய மற்றும் சர்வதேச போட்டிகளில் தங்கம் வென்று இந்தியாவுக்கும், தமிழகத்துக்கும் பெருமை சேர்ப்பதே எனது லட்சியம்’’ என்றார்.