பிரபல பாலிவுட் நடிகர் சுஷாந்த் சிங் ராஜ்புத் மரணத்துக்கு அவரது தற்கொலைதான் காரணம் என்று தெரிவித்து, சி.பி.ஐ (மத்திய புலனாய்வு இயக்ககம்) கோர்ட்டில் இறுதி அறிக்கையை தாக்கல் செய்துள்ளது.
34 வயதான சுஷாந்த், பாலிவுட்டில் பல்வேறு வெற்றி படங்களில் நடித்து புகழ்பெற்ற நடிகராக இருந்தார். 2020ஆம் ஆண்டு ஜூன் 14ம் தேதி, மும்பை பாந்த்ரா பகுதியில் உள்ள அவரது அடுக்குமாடி குடியிருப்பில் அவர் தூக்கில் தொங்கிய நிலையில் கண்டெடுக்கப்பட்டார்.
அதன் பின்னர் நடத்தப்பட்ட பிரேத பரிசோதனையில், இது தற்கொலை என தெரிவிக்கப்பட்டது. இருப்பினும், அவரது மரணத்தில் சந்தேகம் இருப்பதாக சுஷாந்தின் தந்தை புகார் செய்ததால், மும்பை போலீசார், அமலாக்கத்துறை, சி.பி.ஐ மற்றும் போதைப்பொருள் தடுப்பு பிரிவு உட்பட பல்வேறு அதிகாரப்பூர்வ துறைகள் விசாரணை நடத்தின.
இந்த வழக்கில், பிரேத பரிசோதனை குழுவில் பணியாற்றிய ரூப்குமார் ஷா என்பவர், சுஷாந்தின் உடலில் பல்வேறு காயங்கள் இருந்ததாகவும், அவர் தற்கொலை செய்யவில்லை, கொலை செய்யப்பட்டிருக்கலாம் என்று வெளியுறையாக தெரிவித்தார்.
இந்நிலையில், நான்கரை ஆண்டுகளாக நடைபெற்ற விசாரணைக்குப் பிறகு, சி.பி.ஐ இறுதியாக தற்கொலைதான் காரணம் என்று உறுதிபடுத்தி அறிக்கை தாக்கல் செய்துள்ளது.
சி.பி.ஐ தரப்பில், “நடிகர் சுஷாந்த் மரணத்தை கொலை என சந்தேகிக்க எந்த அறிவியல் ஆதாரமும் இல்லை. சமூக வலைதளங்களில் பரவிய தகவல்களும் தவறானவை. மன அழுத்தத்தால் அவர் தற்கொலை செய்து கொள்ள வாய்ப்புள்ளது” என்று கோர்ட்டில் விளக்கம் அளிக்கப்பட்டுள்ளது.
விசாரணை முடிவுக்கு வந்த நிலையில், சுஷாந்த் மரணம் தொடர்பான வழக்கை சி.பி.ஐ முடித்துக்கொள்ள உள்ளதாக அதிகாரப்பூர்வமாக தெரிவித்துள்ளது.
