புதுடில்லி: பீஹார் சட்டசபை தேர்தலில் தேஜ கூட்டணி வெற்றி பெற்றால், நிதிஷ் குமார் மீண்டும் முதல்வராக நியமிக்கப்படுவாரா என்ற கேள்விக்கு பதிலளித்த மத்திய உள்துறை அமைச்சர் அமித் ஷா, “அது தேர்தல் முடிவுக்கு பிறகே தீர்மானிக்கப்படும்” என்று தெரிவித்துள்ளார். பீஹாரில் மொத்தம் 243 தொகுதிகளுக்கான வாக்குப்பதிவு நவம்பர் 6 மற்றும் 11 ஆம் தேதிகளில் நடைபெற உள்ளது. நவம்பர் 14 ஆம் தேதி வாக்கு எண்ணிக்கை நடைபெறும் நிலையில், பா.ஜ. தலைமையிலான தேஜ கூட்டணி ஆட்சியைத் தக்கவைத்துக் கொள்ள தீவிரம் காட்டி வருகிறது.
அமித் ஷா கூறுகையில், “முதல்வர் நிதிஷ் குமார் தலைமையிலேயே தேஜ கூட்டணி இந்தத் தேர்தலில் போட்டியிடுகிறது. தேர்தலுக்குப் பிறகு கூட்டணி கட்சிகள் ஒன்றாக அமர்ந்து முதல்வர் வேட்பாளரை முடிவு செய்யும். 2020ம் ஆண்டு தேர்தலுக்குப் பிறகு நிதிஷ் குமார் தாமாகவே பிரதமர் நரேந்திர மோடியை அணுகி, பா.ஜ. அதிக இடங்களைப் பெற்றதால், பா.ஜ.வின் ஒருவரை முதல்வராக நியமிக்கலாம் என்று தெரிவித்தார். ஆனால் நாங்கள் கூட்டணியையும், நிதிஷ் குமாரின் அரசியல் அனுபவத்தையும் மதித்து அவரையே முதல்வராக நியமித்தோம்” என்றார்.
அமித் ஷா மேலும் கூறுகையில், “லாலு பிரசாத் யாதவின் ஆட்சிக் காலத்தை அனுபவித்த பீஹாரின் மக்கள் மீண்டும் அந்த நிலைக்கு திரும்ப விரும்பவில்லை. நிதிஷ் குமார் காங்கிரஸில் 2.5 ஆண்டுகளே இருந்தார்; ஆனால் அவர் அரசியல் வாழ்க்கை முழுவதும் காங்கிரஸை எதிர்த்தே வளர்ந்தது. காங்கிரஸ் தனது ஆணவத்தால் மாநிலங்களில் அடிப்படை ஆதரவை இழந்துவிட்டது. பீஹாரிலும் அதே நிலைதான்” என்றார்.
பீஹாரின் அரசியல் சூழல் தற்போது கடுமையாக மாறி வருவதாகவும், நிதிஷ் குமாரின் அனுபவமும் அமித் ஷாவின் தந்திரங்களும் தேஜ கூட்டணிக்கு முக்கிய பலமாக இருக்கும் எனவும் கூறப்படுகிறது. தேர்தலுக்குப் பிறகு யார் முதல்வராக வருவார் என்பதே இப்போது அனைவரும் எதிர்நோக்கும் கேள்வியாக மாறியுள்ளது.
