திருப்பதி: ஆகஸ்ட் 15-ம் தேதி சுதந்திர தினத்தன்று மாநிலம் முழுவதும் பெண்களுக்கான இலவசப் பேருந்து பயணத் திட்டம் செயல்படுத்தப்படும் என்று ஆந்திரப் பிரதேச முதல்வர் சந்திரபாபு நாயுடு அறிவித்துள்ளார். இந்தத் தேர்தல் வாக்குறுதியை நிறைவேற்ற மாநிலம் முழுவதும் தீவிர ஏற்பாடுகள் நடந்து வருகின்றன.
இதற்கிடையில், ஆந்திரப் பிரதேச மாநில பேருந்துப் போக்குவரத்துக் கழக (ஏபிஎஸ்ஆர்டிசி) நிர்வாக இயக்குநர் வாகாடு திருமலை ராவ் திருப்பதி வெங்கடகிரி அருகே உள்ள வாகட் பேருந்து பணிமனையை ஆய்வு செய்தார். பங்கேற்பாளர்களிடம் பேசிய அவர் கூறியதாவது:-
பெண்களுக்கான இலவசப் பேருந்துத் திட்டத்திற்காக இதுவரை 750 புதிய பேருந்துகள் வாங்கப்பட்டுள்ளன. மேலும் 600 பேருந்துகள் வழங்கப்பட உள்ளன. இந்தத் திட்டம் அடுத்த மாதம் 15-ம் தேதி முதல் அமலுக்கு வரும். மொத்தம் 11,000 பேருந்துகளில் 74 சதவீத பேருந்துகள் பெண்களுக்கான இலவசப் பயணத் திட்டத்திற்காக ஒதுக்கப்பட்டுள்ளன.
ஒருங்கிணைந்த மாவட்டங்களில் இந்தத் திட்டம் செயல்படுத்தப்படும். அனைத்து பேருந்து நிறுத்தங்களிலும் குடிநீர், கழிப்பறைகள், மின்விசிறிகள் மற்றும் நாற்காலிகள் வழங்கப்படும் என்றார்.
