திருமலை: கூடுதல் நிர்வாக அதிகாரி வெங்கையா சவுத்ரி தலைமையில் நேற்று திருமலையில் உள்ள ஆஸ்தான மண்டபத்தில் தனியார் ஹோட்டல் மற்றும் துரித உணவு உணவக உரிமையாளர்களுடன் ஆலோசனைக் கூட்டம் நடைபெற்றது. அப்போது பேசிய வெங்கையா சவுத்ரி, “திருமலைக்கு வரும் பக்தர்கள் பாரம்பரிய உடைகளை அணிவது போல, உணவு முறையிலும் சில சடங்குகளைப் பின்பற்ற நடவடிக்கை எடுக்கப்பட்டு வருகிறது.
திருமலைக்கு வரும் பெரும்பாலான பக்தர்கள் தேவஸ்தானம் வழங்கும் அன்னபிரசாதத்தை உண்கிறார்கள். ஆனால் சிலர் தனியார் ஹோட்டல்கள் மற்றும் துரித உணவு உணவகங்களில் சாப்பிடுகிறார்கள். பாரம்பரிய முறைப்படி தயாரிக்கக்கூடிய உணவை மட்டுமே அவ்வாறு சாப்பிடக்கூடிய பக்தர்களுக்கு வழங்க வேண்டும். எதிர்காலத்தில், சீன உணவுப் பொருட்களை தயாரிக்கவோ விற்கவோ கூடாது. திருமலை முழுவதும் இது தடைசெய்யப்படுகிறது,” என்று அவர் கூறினார்.
இதற்கு பதிலளிக்கும் விதமாக, பரிமாறப்படும் சீன உணவுகளின் எண்ணிக்கையை படிப்படியாகக் குறைப்பதாக ஹோட்டல் உரிமையாளர்கள் உறுதியளித்தனர். இதற்கிடையில், பக்தர்கள் தங்கள் விருப்பங்களுக்கு ஏற்ப சாப்பிடக்கூடிய சீன உணவுக்கு கட்டுப்பாடுகளை விதிப்பது பொருத்தமானதல்ல என்று சமூக ஊடகங்களில் பலர் தங்கள் கருத்தை வெளிப்படுத்தி வருவது குறிப்பிடத்தக்கது.
