கோவை: துபாயில் இருந்து கோழிக்கோடு சென்ற விமானம் மோசமான வானிலை காரணமாக கோவை விமான நிலையத்தில் தரையிறங்கியது.
துபாயில் இருந்து கேரள மாநிலம் கோழிக்கோடுக்கு இன்று (அக்டோபர் 12) காலை சென்று கொண்டிருந்த ‘பிளை துபாய்’ நிறுவனத்துக்கு சொந்தமான விமானத்தில் 100-க்கும் மேற்பட்டோர் பயணம் செய்தனர்.
கோழிக்கோடு விமான நிலையத்தில் மோசமான வானிலை நிலவியதால், அரை மணி நேரத்துக்கும் மேலாக காற்றில் சுற்றிய விமானம் பாதுகாப்பு காரணங்களுக்காக கோவை சர்வதேச விமான நிலையத்திற்கு திருப்பி விடப்பட்டது.
விமானம் இன்று காலை 7.45 மணிக்கு கோவையில் தரையிறங்கியது. வானிலை தெளிவானதும் கோழிக்கோடுக்கு விமானம் புறப்படும் என்று அதிகாரிகள் தெரிவித்தனர்.
