புதுடில்லி: இஸ்ரேல்–ஹமாஸ் இடையே நடந்துவரும் நீண்டகால போர் நிறுத்தம் நோக்கிய முக்கிய முன்னேற்றமாக, அமெரிக்க அதிபர் டிரம்ப் அறிவித்துள்ள அமைதித் திட்டத்தின் முதல் கட்ட ஒப்பந்தம் சர்வதேச கவனத்தை ஈர்த்துள்ளது. இந்த ஒப்பந்தத்தை இந்திய பிரதமர் நரேந்திர மோடி வரவேற்று, இது பிராந்திய அமைதிக்கான முக்கியமான படியாக அமையும் என தெரிவித்துள்ளார்.
அமெரிக்காவின் முயற்சியுடன், கத்தார், எகிப்து மற்றும் துருக்கி நாடுகள் மத்தியஸ்தராக செயல்பட்டன. அவர்களின் பங்களிப்பை பாராட்டிய டிரம்ப், “இஸ்ரேல்–ஹமாஸ் போரை முடிவுக்குக் கொண்டு வர முக்கிய முன்னேற்றம் கிடைத்துள்ளது” என கூறினார். இஸ்ரேலும் ஹமாஸும் இணக்கப்பாட்டை எட்டியிருப்பது, மனிதாபிமான நிவாரணம் மற்றும் கைதிகள் விடுதலைக்கான வழியைத் திறந்துவைத்துள்ளது.
இந்நிலையில் பிரதமர் மோடி தனது சமூக வலைத்தளப் பதிவில், “அதிபர் டிரம்பின் முயற்சியும், பிரதமர் நெதன்யாகுவின் தலைமையும் பாராட்டத்தக்கது. இந்த ஒப்பந்தம் காசா மக்களுக்கு நிம்மதி மற்றும் மனிதாபிமான உதவிகளை அளிக்கும் வாய்ப்பாகும். நிலையான அமைதிக்கான அடித்தளத்தை அமைக்கும்” என தெரிவித்துள்ளார்.
காசா பகுதியில் மாதக்கணக்கில் தொடர்ந்துவரும் தாக்குதல்களும் உயிரிழப்புகளும் உலகளவில் கண்டனத்துக்குள்ளாகியுள்ளன. இந்நிலையில் ஒப்பந்தம் கையெழுத்தானது பிராந்தியத்தில் அமைதியை மீட்டெடுக்கும் நம்பிக்கையை ஏற்படுத்தியுள்ளது. இந்தியா எப்போதும் சமரசம் மற்றும் உரையாடலின் வழியே அமைதி நிலைநிறுத்தப்படும் என்ற நிலைப்பாட்டில் உள்ளது.
