புதுடெல்லி: பியர்சன் நிறுவனம் உலக நாடுகளின் ஆங்கில புலமை குறித்து ஆய்வு செய்து தரவரிசை பட்டியலை வெளியிட்டு வருகிறது. இந்த பட்டியல் நிறுவனத்தின் வெர்சன்ட் சோதனை மூலம் தயாரிக்கப்பட்டது. அதன்படி, பியர்சன் வெளியிட்ட 2024-ம் ஆண்டுக்கான பட்டியலில், ஆங்கிலம் பேசுவதில் உலக சராசரியை இந்தியா தாண்டியுள்ளது.
ஆங்கிலம் பேசுவதில் இந்தியா 57 மதிப்பெண் பெற்றுள்ளது. இதில், உலக சராசரி 54. ஆங்கில எழுத்துத் திறன் பிரிவில் இந்தியாவின் சராசரி மதிப்பெண் (61) உலக சராசரிக்கு இணையாக உள்ளது. ஆங்கில புலமை பிரிவில் இந்தியா 52 மதிப்பெண் பெற்றுள்ள நிலையில், உலக சராசரி 57 மதிப்பெண்.
ஆங்கிலம் பேசும் திறனில் தலைநகர் டெல்லி 63 மதிப்பெண்களுடன் இந்தியாவிலேயே அதிக மதிப்பெண் பெற்றுள்ளது. ராஜஸ்தான் (60), பஞ்சாப் (58) அடுத்த இடங்களில் உள்ளன. தமிழகம் 52 மதிப்பெண்களுடன் 6வது இடத்தில் உள்ளது. ஆங்கிலம் பேசுவதில் 63 மதிப்பெண்களுடன் நிதி மற்றும் வங்கித் துறை முதலிடத்தில் உள்ளது. ஐடி மற்றும் பிபிஓ துறைகள் தலா 57 மதிப்பெண்களுடன் 4-வது இடத்தைப் பகிர்ந்து கொள்கின்றன.
