“தமிழில் இருந்து பிறந்ததுதான் கன்னடம்” என நடிகர் கமல்ஹாசன் பேசியது கர்நாடகாவில் கடும் விமர்சனத்தை எழுப்பியது. இதைத் தொடர்ந்து, அவரது “தக் லைஃப்” படத்திற்கு தடை விதிப்பதாக கர்நாடக திரைப்பட வர்த்தக சம்மேளனம் அறிவித்தது. இதற்கு எதிராக தயாரிப்பு நிறுவனம் ராஜ்கமல் பிலிம்ஸ் உயர்நீதிமன்றத்தில் வழக்கு தொடுத்தது.
இந்த வழக்கை விசாரித்த நீதிபதி நாகபிரசன்னா, கமல், மொழி ஆய்வாளர் அல்லது வரலாற்று நிபுணரா எனக் கேள்வி எழுப்பினார். பிரபலமான நபராகக் கமல் பொறுப்புடன் பேச வேண்டியது அவசியம் என்றும், ஒரு மன்னிப்பு கேட்டிருந்தாலே பிரச்சனை தீர்ந்திருக்கும் என்றும் நீதிபதி தெரிவித்தார். தற்போது கமல் காவல் பாதுகாப்பு கோரி வருவது சரியல்ல என்றும் அவர் விமர்சித்தார்.
நீர், நிலம், மொழி என மூன்றும் மக்களின் அடையாளம் என்று நீதிபதி கூறினார். பிறரின் உணர்வுகளை புண்படுத்த யாருக்கும் உரிமை இல்லை என்றும், மன்னிப்பு கேட்ட பிறகே வழக்கு தொடர்ந்து விசாரிக்கப்படும் என்றும் தெரிவித்தார். இதையடுத்து வழக்கு பிற்பகல் 2.30 மணிக்கு ஒத்திவைக்கப்பட்டது.
மீண்டும் விசாரணை தொடங்கியபோது, நீதிபதி “மன்னிப்பு கேட்பதில் என்ன ஈகோ?” என்று கேள்வி எழுப்பினார். கமல் தரப்பில், கர்நாடகா திரைப்பட வர்த்தக சபையுடன் பேச்சுவார்த்தை நடத்த தயாராக உள்ளதாகவும், பட வெளியீட்டை தற்காலிகமாக ஒத்திவைக்கத் தயார் எனவும் கூறப்பட்டது. இதை ஏற்று நீதிமன்றம் வழக்கை மீண்டும் ஒத்திவைத்தது.
முன்னதாக, கமல் பக்கம், “தவறாக புரிந்துகொண்டதற்காக எவ்வாறு மன்னிப்பு கேட்க முடியும்? அவரிடம் கன்னட மொழிக்கு நிகரற்ற அன்பே உள்ளது” எனக் கூறினர். ஆனால் நீதிபதிகள், “மன்னிப்பு என்ற வார்த்தை ஏன் இல்லையே?” என வினவினர்.
இந்நிலையில், முன்னாள் முதல்வர் எடியூரப்பா கருத்து வெளியிட்டார். கமல் மன்னிப்பு கேட்க வேண்டும் என்றும், நல்லிணக்கம் மிக முக்கியம் என்றும் அவர் தெரிவித்தார். அவர், “மொழியியல் நிபுணர் அல்லாத ஒருவர் கன்னடத்தின் தோற்றம் குறித்து பேசுவது வருந்தத்தக்கது. மன்னிப்பு கேட்பது தாழ்வு அல்ல, நல்லிணக்கத்துக்கு அது தேவை” என்றார். இந்த விவகாரம் சமூக மற்றும் அரசியல் ரீதியாக பரபரப்பை ஏற்படுத்தி வருகிறது.
