புது டெல்லி: டெல்லியில் வசிக்கும் ஜாட் சமூகத்தினருக்கு இடஒதுக்கீடு வழங்குவதாக பாஜக அளித்த வாக்குறுதி இன்னும் நிறைவேற்றப்படவில்லை என்று அரவிந்த் கெஜ்ரிவால் குற்றம் சாட்டினார். டெல்லியின் முன்னாள் முதல்வரும் ஆம் ஆத்மி கட்சியின் ஒருங்கிணைப்பாளருமான அரவிந்த் கெஜ்ரிவால் நேற்று டெல்லியில் செய்தியாளர்களிடம் கூறியதாவது:-
2015-ம் ஆண்டில், டெல்லி ஜாட் சமூகத் தலைவர்களை பாஜக பிரதமர் மாளிகைக்கு அழைத்தது. அப்போது, டெல்லி ஜாட் சமூகத்தினர் மத்திய ஓபிசி பட்டியலில் சேர்க்கப்படுவார்கள் என்று உறுதியளிக்கப்பட்டது. 2019-ம் ஆண்டில், மத்திய அமைச்சர் அமித் ஷா மீண்டும் இந்த வாக்குறுதியை அளித்தார்.
இருப்பினும், இந்த வாக்குறுதி இதுவரை நிறைவேற்றப்படவில்லை. ராஜஸ்தானைச் சேர்ந்த ஜாட் மாணவர்கள் டெல்லி பல்கலைக்கழகத்தில் இடஒதுக்கீடு பெறுகின்றனர். ஆனால் அவர்கள் மத்திய ஓபிசி பட்டியலில் சேர்க்கப்படாததால், டெல்லியைச் சேர்ந்த ஜாட் மாணவர்கள் இடஒதுக்கீடு பெற முடியவில்லை.
எனவே, டெல்லி ஜாட் சமூகத்தினரை மத்திய ஓபிசி பட்டியலில் சேர்க்கக் கோரி பிரதமர் நரேந்திர மோடிக்கு கடிதம் எழுதியுள்ளேன். இதற்காக ஆம் ஆத்மி கட்சி தொடர்ந்து போராடும் என்று அவர் கூறினார்.
