கொல்கத்தா: மேற்கு வங்க மாநிலம் மால்டா மாவட்டத்தில் உள்ள மொதபாரி பகுதியில் கடந்த 27-ம் தேதி இரு பிரிவினருக்கு இடையே வன்முறை வெடித்தது. வன்முறை தொடர்பாக 61 பேர் கைது செய்யப்பட்டனர். இந்த சம்பவத்தை தொடர்ந்து அந்த பகுதிகளில் இணையதள சேவை துண்டிக்கப்பட்டது. இந்நிலையில், ரம்ஜான் பண்டிகையை முன்னிட்டு கொல்கத்தாவில் இஸ்லாமியர்கள் ஏற்பாடு செய்திருந்த நிகழ்ச்சியில் பேசிய அம்மாநில முதல்வர் மம்தா பானர்ஜி, மாநிலத்தில் அமைதியை நிலைநாட்ட எனது அரசு உறுதிபூண்டுள்ளது.
கலவரங்களை தடுப்பதில் உறுதியாக உள்ளோம். அனைத்து மதங்களுக்காகவும் உயிரை தியாகம் செய்ய தயாராக உள்ளோம். சிறுபான்மையினரைப் பாதுகாப்பது பெரும்பான்மையினரின் கடமை, சிறுபான்மையினரின் கடமை பெரும்பான்மையினருடன் இருக்க வேண்டும். யாரையும் கலவரம் செய்ய அனுமதிக்க மாட்டோம். கலவரத்தை நிறுத்த வேண்டும் என்ற ஒரே ஒரு குரல்தான் எங்களிடம் உள்ளது. நாங்கள் மதச்சார்பற்றவர்கள்.
நவராத்திரி நடக்கிறது; அதற்கும் எனது வாழ்த்துகளைத் தெரிவித்துக் கொள்கிறேன். யாரும் குழப்பத்தை ஏற்படுத்துவதை நாங்கள் விரும்பவில்லை. சாமானியர்கள் குழப்பத்தை உருவாக்கவில்லை, ஆனால் அரசியல் கட்சிகள் செய்கின்றன. இன்று சிவப்பும் குங்குமமும் ஒன்றாகிவிட்டது. அப்படியே இருக்கட்டும். இது வெட்கக்கேடான விஷயம்” என்றார்.
இதற்கிடையில், மொதபாரி பகுதியில் தற்போது நிலைமை கட்டுக்குள் இருப்பதாக சட்டம் மற்றும் ஒழுங்கு கூடுதல் இயக்குநர் ஜெனரல் (ஏடிஜி) ஜாவேத் ஷமிம் தெரிவித்தார். செய்தியாளர்களிடம் பேசிய அவர், “தற்போது நிலைமை முற்றிலும் கட்டுக்குள் உள்ளது. இதுவரை 19 வழக்குகள் பதிவு செய்யப்பட்டு 61 பேர் கைது செய்யப்பட்டுள்ளனர். இன்று வன்முறை சம்பவங்கள் எதுவும் நடைபெறவில்லை” என்றார்.
