டெல்லி: தலைநகர் டெல்லியில் கடந்த சில நாட்களாக கடும் பனிமூட்டம் நிலவி வருகிறது. பனிமூட்டம் காரணமாக டெல்லியில் விமான சேவை பாதிக்கப்பட்டுள்ளது. கடும் மூடுபனி மற்றும் போதிய வெளிச்சமின்மை காரணமாக இன்று காலை டெல்லி இந்திரா காந்தி சர்வதேச விமான நிலையத்தில் பல விமானங்கள் தாமதமாக வந்ததாக அதிகாரி ஒருவர் தெரிவித்தார்.
இதனால், பயணிகள் கடும் அவதிக்குள்ளாகினர். டெல்லி சர்வதேச விமான நிலையத்தால் வெளியிடப்பட்ட எக்ஸ்-போஸ்ட்டில், புதுப்பிக்கப்பட்ட விமானத் தகவல்களுக்கு பயணிகள் சம்பந்தப்பட்ட விமான நிறுவனத்தைத் தொடர்பு கொள்ளுமாறு கேட்டுக் கொள்ளப்படுகிறார்கள். ஏதேனும் அசௌகரியம் ஏற்பட்டால் வருந்துவதாகவும் தெரிவிக்கப்பட்டுள்ளது.
டெல்லியில் பனிமூட்டம் தொடர்ந்து அதிகரிக்கலாம் என வானிலை ஆய்வு மையம் தெரிவித்துள்ளது. டெல்லியில் குறைந்தபட்ச வெப்பநிலை 11 டிகிரி செல்சியஸாக இருக்கும் என்றும் எதிர்பார்க்கப்படுகிறது.
