கிழக்கு ஆப்ரிக்காவில் அமைந்துள்ள மடகாஸ்கர், உலகின் மிக ஏழ்மையான நாடுகளில் ஒன்றாகக் கருதப்படுகிறது. நீண்ட காலமாக மின்வெட்டு மற்றும் குடிநீர் தட்டுப்பாட்டால் மக்கள் கடும் அவதிக்குள்ளாகி வந்தனர். இந்த நெருக்கடி நிலைமைக்கு எதிராக தலைநகர் அண்டனனாரிவோவில் இளைஞர்கள் பெரும் அளவில் போராட்டத்தில் ஈடுபட்டனர். அரசின் அலட்சியம் மற்றும் பொருளாதார சீர்கேட்டை சுட்டிக்காட்டி அவர்கள் நீதி கோரி தெருக்களில் இறங்கினர்.
போராட்டம் தீவிரமடைந்த நிலையில், மடகாஸ்கர் ராணுவத்தின் துணைப் பிரிவான ஜென்டர்மேரி படையினர் போராட்டக்காரர்களுக்கு ஆதரவாக களமிறங்கினர். இதனால் நாட்டின் ஆட்சியில் பெரும் அதிர்வுகள் ஏற்பட்டன. மடகாஸ்கர் அதிபர் ஆண்ட்ரி ராஜோலினா திடீரென நாட்டை விட்டு தப்பிச் சென்றார். தலைநகர் முழுவதும் ராணுவம் கட்டுப்பாட்டை எடுத்து, அரசு அலுவலகங்களை மூடிவிட்டது.
இதையடுத்து, ராணுவ தளபதியான கர்னல் மைக்கேல் ராண்ட்ரியானிரினா ஆட்சியை கைப்பற்றினார். ராணுவப் புரட்சி மூலம் அதிகாரத்தை ஏற்று, நாட்டின் புதிய அதிபராக அவர் பதவியேற்றார். அவரது தலைமையில் இடைக்கால ராணுவ நிர்வாகம் அமைக்கப்பட்டுள்ளது. மக்கள் நலனுக்கான புதிய திட்டங்கள் மற்றும் வெளிநாட்டு கடன் ஒப்பந்தங்களை மறுபரிசீலனை செய்ய இருப்பதாக அவர் அறிவித்தார்.
இந்த திடீர் அரசியல் மாற்றம் உலக நாடுகளின் கவனத்தையும் ஈர்த்துள்ளது. ஆப்ரிக்க ஒன்றியம் மற்றும் ஐநா இரண்டும் மடகாஸ்கரில் அமைதியை பேணுமாறு ராணுவத்திடம் வேண்டுகோள் விடுத்துள்ளன. மக்கள் அடிப்படை தேவைகள் நிறைவேறும் வரை போராட்டத்தை நிறுத்தமாட்டோம் என இளைஞர்கள் வலியுறுத்துகின்றனர். மடகாஸ்கர் தற்போது ராணுவ ஆட்சியின் கீழ் புதிய அத்தியாயத்தை தொடங்கியுள்ளது.
