புது டெல்லி: 1993 தொடர் குண்டுவெடிப்பு வரை மும்பை பாதாள உலக தாதாக்களின் பிடியில் இருந்தது. தாவூத் இப்ராஹிம், சோட்டா ராஜன் மற்றும் ரவி பூஜாரி போன்றவர்களுக்கு சவால் விடுத்தவர் அருண் காவ்லி (76). அவரது ஆதரவாளர்களால் அவர் ‘அப்பா’ என்று அன்பாக அழைக்கப்பட்டார். மும்பையின் பைகுல்லா பிளாக்கில் உள்ள தக்தி சாலை அவரது வீடு. ஒரு எளிய மராத்தி குடும்பத்திலிருந்து வளர்ந்து மும்பையின் கேங்ஸ்டர்களின் உலகில் ஒரு நட்சத்திரமாக மாறிய காவ்லியின் வாழ்க்கை ஏதோ ஒரு திரைப்படத்தைப் போன்றது.
மெட்ரிகுலேஷன் முடித்த பிறகு இளம் வயதிலேயே குற்ற உலகில் நுழைந்தார் கவ்லி. 1980-களில், அவர் தனது நண்பர் ராம நாயக் கும்பலுடன் இணைந்து பணியாற்றத் தொடங்கினார். இந்த நேரத்தில்தான் மும்பை பாதாள உலகில் வளர்ந்து வரும் கேங்ஸ்டர்களான தாவூத் இப்ராஹிம் மற்றும் சோட்டா ராஜனை சந்திக்கும் வாய்ப்பு அவருக்குக் கிடைத்தது. தாவூத்தின் சட்டவிரோத ஆயுதங்கள் மற்றும் போதைப்பொருட்களை பாதுகாப்பான இடங்களுக்கு கொண்டு செல்லும் பொறுப்பு காவ்லியிடம் வழங்கப்பட்டது.
இந்த நட்பு சிறிது காலம் நீடித்தது, ஆனால் 1988-ம் ஆண்டில், காவ்லியின் நெருங்கிய நண்பர் ராமா நாயக் கும்பல்களுக்கு இடையேயான மோதலில் கொல்லப்பட்டார். இந்தக் கொலைக்கு தாவூத் இப்ராஹிம் தான் காரணம் என்று காவ்லி சந்தேகித்தார். இது காவ்லியை மிகவும் காயப்படுத்தியது. தாவூத்தை விட்டு பிரிந்த காவ்லி, தனது சொந்த கும்பலை உருவாக்கினார். இது காவ்லிக்கும் தாவூத்துக்கும் இடையிலான மோதலை தீவிரப்படுத்தியது. இதில், பல துப்பாக்கிச் சண்டைகள் இரு தரப்பிலும் உயிரிழப்புகளை ஏற்படுத்தின. 1993 மும்பை குண்டுவெடிப்புகளுக்குப் பிறகு, பல பாதாள உலக தாதாக்கள் மும்பையை விட்டு வெளியேறி தலைமறைவாகினர்.
இதன் பிறகு, மற்றொரு பாதாள உலக தாதாவாக உருவெடுத்த ரவி பூஜாரி, காவ்லிக்கு எதிராக ஒரு கும்பலை உருவாக்கினார். இருவருக்கும் இடையே பல மோதல்கள் நடந்தன. ஆனால் காவ்லிக்கு அல்லூர் மராத்தி சமூகத்தின் ஆதரவு இருந்தது. இந்தியாவிற்கு வெளியே இருந்து செயல்பட்ட சோட்டா ராஜன் போன்ற பெரிய தாதாக்களால் கூட காவ்லியை எதிர்கொள்ள முடியவில்லை. பின்னர், காவ்லி அரசியலில் நுழைந்தார்.
2004-ம் ஆண்டு, அவர் அகில பாரதிய சேனா (ABS) என்ற அமைப்பை நிறுவினார், அது சின்ச்போக்லியில் இருந்து வெற்றி பெற்று MLA ஆனார். அரசியல் மோதல்களிலும் ஈடுபட்டுள்ள காவ்லி, 2008-ம் ஆண்டு சிவசேனா கவுன்சிலர் காம்லேகர் கொலை வழக்கில் குற்றவாளி என நிரூபிக்கப்பட்டார். 2012-ம் ஆண்டு, காவ்லிக்கு ஆயுள் தண்டனை விதிக்கப்பட்டது.
இதற்காக, அவர் நாக்பூர் மத்திய சிறையில் 17 ஆண்டுகள் சிறைத்தண்டனை அனுபவித்தார், நேற்று உச்ச நீதிமன்றத்தால் ஜாமீன் வழங்கப்பட்டது. நூற்றுக்கணக்கான ஆதரவாளர்கள் ஊர்வலமாக அவருடன் சென்றனர். காவ்லியின் விடுதலை மும்பை அரசியல் அரங்கில் பரபரப்பை ஏற்படுத்தியுள்ளது. அவரது கட்சியான APS, மீண்டும் நகராட்சித் தேர்தலில் போட்டியிடும் என்று எதிர்பார்க்கப்படுகிறது.
