திருவனந்தபுரம்: கேரளாவில் 18 வயது சிறுமிக்கும் 38 வயது பெண்ணுக்கும் நிபா வைரஸ் தொற்று உறுதி செய்யப்பட்டதை அடுத்து, அவர்களுக்கு சிகிச்சை அளித்த மருத்துவர்கள் மற்றும் சுகாதாரப் பணியாளர்கள் தனிமைப்படுத்தப்பட்டுள்ளனர். மலப்புரம் மாவட்டத்தைச் சேர்ந்த 18 வயது சிறுமி சமீபத்தில் மூளைக்காய்ச்சல் அறிகுறிகளுடன் ஒரு தனியார் மருத்துவமனையில் சிகிச்சை பெற்றார்.
பின்னர் அவர் கோழிக்கோட்டில் உள்ள மற்றொரு தனியார் மருத்துவமனைக்கு மாற்றப்பட்டார். அங்கு சிகிச்சை பெற்று வந்த சிறுமி, ஜூலை 1-ம் தேதி சிகிச்சைக்கு எந்த பலனும் இல்லாமல் இறந்தார். இதைத் தொடர்ந்து, கோழிக்கோட்டில் உள்ள அரசு மருத்துவக் கல்லூரி மருத்துவமனையில் பிரேத பரிசோதனை நடத்தப்பட்டது. சிறுமிக்கு நிபா வைரஸ் தொற்று இருப்பது உறுதி செய்யப்பட்ட பிறகு, மருத்துவர்கள், சுகாதாரப் பணியாளர்கள் மற்றும் பிரேத பரிசோதனை செய்தவர்கள் தனிமைப்படுத்தப்பட்டுள்ளனர்.
இதேபோல், கேரள மாநிலம் பாலக்காடு மாவட்டத்தில் உள்ள தச்சநாட்டுகாராவைச் சேர்ந்த 38 வயது பெண் ஒருவர் அதிக காய்ச்சல் காரணமாக கரிங்கலத்தானி மருத்துவமனையிலும், பின்னர் மன்னார்க்காடு மருத்துவமனையிலும் சிகிச்சை பெற்றார். பின்னர், அவர் பெரிந்தல்மன்னா மருத்துவமனையில் அனுமதிக்கப்பட்டார். அவருக்கு நிபா தொற்று இருப்பது தற்போது உறுதி செய்யப்பட்டுள்ளது. புனேவில் உள்ள தேசிய வைராலஜி நிறுவனம் (NIV) இன்று இதை உறுதிப்படுத்தியது. அவரது உடல்நிலை மோசமடைந்ததை அடுத்து, பெரிந்தல்மன்னா மருத்துவமனையில் வென்டிலேட்டர் உதவியுடன் அவருக்கு சிகிச்சை அளிக்கப்பட்டு வருவதாக மாவட்ட மருத்துவ அதிகாரி (DMO) ஆர். ரேணுகா தெரிவித்தார்.
நிபா வைரஸ் தொற்று உறுதி செய்யப்பட்ட பிறகு, மலப்புரம், பாலக்காடு மற்றும் கோழிக்கோடு மாவட்டங்களில் சுகாதார அதிகாரிகள் மிகுந்த எச்சரிக்கையுடன் உள்ளனர். வைரஸ் பாதித்த நபருடன் தொடர்பு கொண்டவர்களை அடையாளம் காணவும், அவர்களை தனிமைப்படுத்தவும், கண்காணிக்கவும் அவர்கள் நடவடிக்கை எடுக்கத் தொடங்கியுள்ளனர். இது தொடர்பாக செய்தியாளர்களிடம் பேசிய கேரள சுகாதார அமைச்சர் வீணா ஜார்ஜ், “புனேவில் நிபா வைரஸ் உறுதி செய்யப்படுவதற்கு முன்பே கேரளாவில் நிபா வைரஸ் தொடர்பான நெறிமுறைகள் செயல்படுத்தப்பட்டன.
இதன் ஒரு பகுதியாக, மலப்புரம், கோழிக்கோடு மற்றும் பாலக்காடு மாவட்டங்களில் வைரஸ் பரவுவதைத் தடுக்க 26 குழுக்கள் அமைக்கப்பட்டுள்ளன. நோயாளிகளுடன் தொடர்பில் இருந்தவர்களைக் கண்டறிய காவல்துறையின் உதவி கோரப்பட்டுள்ளது. மாநில மற்றும் மாவட்ட மட்டங்களில் உதவி எண்கள் வழங்கப்பட்டுள்ளன. பாலக்காடு, மலப்புரம் மற்றும் கோழிக்கோடு மாவட்ட ஆட்சியர்கள் வைரஸ் பரவுவதைத் தடுக்க தேவையான நடவடிக்கைகளை எடுப்பார்கள். கடந்த ஒரு வாரத்தில் நிகழ்ந்த அனைத்து இயற்கைக்கு மாறான மரணங்களும் கண்காணிக்கப்படும்” என்றார்.
