புதுடில்லி: இந்திய அரசியல் வரலாற்றில் பெரும் தாக்கத்தை ஏற்படுத்திய “ஆபரேஷன் புளூஸ்டார்” நடவடிக்கையைப் பற்றி முன்னாள் மத்திய அமைச்சர் சிதம்பரம் திறந்த மனதுடன் கருத்து தெரிவித்துள்ளார். அமிர்தசரஸ் பொற்கோவிலை மீட்கும் நோக்கில் மேற்கொள்ளப்பட்ட இந்த ராணுவ நடவடிக்கை தவறான வழிமுறை என்று அவர் கூறியுள்ளார். இமாச்சல் மாநிலம் கசவுலியில் நடைபெற்ற குஷ்வந்த் சிங் இலக்கிய விழாவில் பேசுகையில், பொற்கோவிலை மீட்கும் முடிவு ராணுவம், போலீஸ், உளவுத்துறை மற்றும் சிவில் அதிகாரிகள் உள்ளிட்ட பல தரப்பினரின் கூட்டு தீர்மானமாக இருந்தது என்றும், அதற்காக இந்திரா காந்தி ஒருவரை மட்டுமே குறை சொல்ல முடியாது என்றும் தெரிவித்தார்.
சிதம்பரம் மேலும் கூறியதாவது, “ஆபரேஷன் புளூஸ்டார்” நடவடிக்கை சரியான வழிமுறை அல்ல. அது ஒரு துரதிருஷ்டமான தவறாக முடிந்தது. அந்த தவறுக்கான விளைவாக, இந்திரா காந்தி தன் உயிரையே இழந்தார். சில ஆண்டுகள் கழித்து, ராணுவத்தை பயன்படுத்தாமல், பொற்கோவிலை மீட்டோம். காலிஸ்தான் பிரிவினைவாதம் இப்போது மங்கிப்போயுள்ளது, மக்கள் பொருளாதார பிரச்சனைகளுக்கு முக்கியத்துவம் அளித்து வருகின்றனர்” என்றார்.
பஞ்சாப்பில் பிரிவினைவாதம் குறைந்து வருவதை சிதம்பரம் பாராட்டினார். “பிரிவினை கோரிக்கைகள் இன்று மங்கிவிட்டன, ஆனால் நாட்டின் உண்மையான சவால் பொருளாதார நிலைமையே. மக்கள் வாழ்க்கைத் தரத்தை மேம்படுத்துவதே அரசியலின் முக்கிய நோக்கம் ஆக வேண்டும்,” என்று அவர் வலியுறுத்தினார். அவரது இந்த கருத்து, அரசியல் வட்டாரங்களில் பெரும் விவாதத்தை கிளப்பியுள்ளது.
1984ம் ஆண்டு ஜூன் மாதம் 1 முதல் 8 வரை நடந்த “ஆபரேஷன் புளூஸ்டார்” நடவடிக்கையில், அமிர்தசரஸ் பொற்கோவிலில் பதுங்கியிருந்த பிந்திரன்வாலே தலைமையிலான பயங்கரவாதிகளை வெளியேற்ற ராணுவம் அனுப்பப்பட்டது. இந்த நடவடிக்கையில் பல உயிரிழப்புகள் நடந்தன. இதன் பின்னர் சீக்கிய சமூகத்தில் பெரும் அதிருப்தி ஏற்பட்டது. அதன் விளைவாக, அப்போது பிரதமராக இருந்த இந்திரா காந்தி, அதே ஆண்டின் அக்டோபர் 31-ஆம் தேதி தனது சீக்கிய பாதுகாவலர்களால் படுகொலை செய்யப்பட்டார். இந்த சம்பவம் இந்திய அரசியல் வரலாற்றில் மறக்க முடியாத ஒரு திருப்பமாக அமைந்தது.
