சர்வதேச நாணய நிதியத்தின் (IMF) செயல் இயக்குநராக இந்தியா சார்பில் பரமேஸ்வரன் ஐயர் நியமிக்கப்பட்டுள்ளார். இதற்கு முன், இந்த பதவியில் கே.வி. சுப்ரமணியம் இருந்தார். அவர் 2022ம் ஆண்டு நவம்பரில் இந்தப் பொறுப்பை ஏற்றிருந்தாலும், பதவிக்காலம் முடிவதற்கு 6 மாதங்கள் முன்பே பணி நீக்கம் செய்யப்பட்டுள்ளார்.
தற்போது உலக வங்கியில் நிர்வாக இயக்குநராக பணியாற்றி வரும் பரமேஸ்வரன் ஐயர், புதிய பதவியில் இந்தியாவை பிரதிநிதித்துவப்படுத்தவுள்ளார். 1981ம் ஆண்டு இந்திய குடிமைப் பணிகளில் சேர்ந்த அவர், பணிநிறைவு அடைந்த பிறகு 2009ல் உலக வங்கியில் மேலாளராக சேர்ந்தார். அங்கு சீனா, வியட்நாம், எகிப்து, லெபனான் மற்றும் வாஷிங்டன் உள்ளிட்ட நாடுகளில் நீர் மற்றும் சுகாதாரத் திட்டங்களை வழிநடத்தினார்.
பொது சுகாதாரம் மற்றும் உள்கட்டமைப்புப் பிரிவுகளில் சிறப்பு கவனம் செலுத்தியவர் பரமேஸ்வரன் ஐயர். 2016ல் பிரதமர் நரேந்திர மோடியின் வேண்டுகோளின் பேரில் ஸ்வச் பாரத் திட்டத்திற்காக இந்தியா திரும்பிய அவர், பின்னர் நிடி ஆயோக் தலைமை நிர்வாகியாகவும் பணியாற்றினார்.
சர்வதேச மேம்பாட்டு நிபுணராகும் அவரின் அனுபவம், இந்தியாவை உலக அளவில் பிரதிநிதித்துவப்படுத்தும் இந்தப் புதிய பொறுப்பில் பலனளிக்கும் என எதிர்பார்க்கப்படுகிறது.
