ஹன்சல்பூர்: மாருதி சுசுகி குஜராத்தின் ஹன்சல்பூரில் ஒரு ஆலையை அமைத்துள்ளது. இது 640 ஏக்கர் பரப்பளவில் பரந்து விரிந்துள்ளது. அங்கு இ-விடாரா மின்சார கார் தயாரிக்கப்பட்டுள்ளது. ஹன்சல்பூர் ஆலையில் தயாரிக்கப்பட்ட முதல் இ-விடாரா மின்சார காரை பிரதமர் மோடி நேற்று கொடியசைத்து தொடங்கி வைத்தார்.
அதைத் தொடர்ந்து நடந்த கூட்டத்தில் பேசிய அவர், “இந்தியாவில் உற்பத்தி செய், உலகத்திற்காக உற்பத்தி செய்” என்ற நமது முயற்சியில் நாம் ஒரு முக்கிய மைல்கல்லை எட்டியுள்ளோம். இந்த ஆலை இந்தியாவிற்கும் ஜப்பானுக்கும் இடையிலான நட்பின் அடையாளமாகும். இப்போது, உலகின் பல நாடுகளில் விற்கப்படும் மின்சார கார்கள் இந்தியாவில் தயாரிக்கப்படுகின்றன.
இதைப் பற்றி நான் மிகவும் பெருமைப்படுகிறேன். ஹன்சல்பூர் மாருதி சுசுகி ஆலையில் தயாரிக்கப்படும் இ-விட்டாரா கார், உலகம் முழுவதும் 100 நாடுகளுக்கு ஏற்றுமதி செய்யப்படுகிறது. விரைவில், உலகம் முழுவதும் இந்திய மின்சார கார்களால் நிரம்பி வழியும். மின்சார கார் உற்பத்திக்குத் தேவையான பேட்டரிகள் இப்போது உள்நாட்டிலேயே தயாரிக்கப்படுகின்றன. குறிப்பாக, ஹன்சல்பூர் மாருதி சுசுகி ஆலையில் ஹைப்ரிட் பேட்டரிகள் தயாரிக்கப்படுகின்றன.
பழைய பெட்ரோல், டீசல் வாகனங்கள் மற்றும் ஆம்புலன்ஸ்களை ஹைப்ரிட் மின்சார வாகனங்களாக மாற்றும் தொழில்நுட்பத்தை உருவாக்குமாறு நான் மாருதி சுசுகியிடம் கேட்டேன். இதை ஒரு சவாலாக எடுத்துக்கொண்டு, நிறுவனம் 6 மாதங்களில் ஹைப்ரிட் மின்சார ஆம்புலன்ஸ் வாகனத்திற்கான முன்மாதிரியை வடிவமைத்துள்ளது. நாடு முழுவதும் ஓடும் பழைய வாகனங்கள் ஹைப்ரிட் மின்சார வாகனங்களாக மாற்றப்பட்டால், காற்று மாசுபாடு கணிசமாகக் குறையும். மின்சார ஆம்புலன்ஸ் வாகனங்களுக்கு PM E-Drive திட்டம் தொடங்கப்பட்டுள்ளது.
இந்தத் திட்டத்திற்காக ரூ. 11,000 கோடி ஒதுக்கப்பட்டுள்ளது. அடுத்த கட்டமாக, குறைக்கடத்தித் துறையில் நாங்கள் மிகுந்த கவனம் செலுத்தி வருகிறோம். நாடு முழுவதும் 6 குறைக்கடத்தி ஆலைகள் அமைக்கப்படுகின்றன. இந்த எண்ணிக்கை படிப்படியாக அதிகரிக்கும். குறைக்கடத்தித் துறையிலும் இந்தியா சாதனை படைக்கும். வெளிநாட்டு முதலீட்டாளர்களை ஈர்ப்பதில் மாநில அரசுகள் தீவிர கவனம் செலுத்த வேண்டும். அப்போதுதான் 2047 ஆம் ஆண்டுக்குள் வளர்ந்த இந்தியா என்ற இலக்கை அடைய முடியும். உள்நாட்டு பொருட்களை மட்டுமே வாங்க வேண்டும் என்பதை நான் தொடர்ந்து வலியுறுத்தி வருகிறேன்.
இது குறித்து தெளிவான விளக்கத்தை அளிக்க விரும்புகிறேன். ஜப்பானிய நிறுவனங்கள் சார்பாக கார்கள் உட்பட பல்வேறு பொருட்கள் இந்தியாவில் தயாரிக்கப்படுகின்றன. அந்தப் பொருட்களும் இந்தியப் பொருட்கள்தான். அவை இந்திய மண்ணில், இந்தியர்களின் கடின உழைப்பு மற்றும் வியர்வையால் தயாரிக்கப்படுகின்றன. அவை 100 சதவீதம் உள்நாட்டுப் பொருட்கள். ஜப்பானிய நிறுவனமான சுசுகி, இந்தியாவின் சர்வதேச தூதராக செயல்பட்டு வருகிறது. அந்த நிறுவனத்திற்கு எனது மனமார்ந்த நன்றியைத் தெரிவித்துக் கொள்கிறேன். நான் விரைவில் ஜப்பானுக்கு அதிகாரப்பூர்வ விஜயம் செய்ய உள்ளேன். அப்போது இந்தியா-ஜப்பான் உறவு மேலும் வலுப்பெறும். இவ்வாறு பிரதமர் நரேந்திர மோடி கூறினார்.
மாருதி சுசுகி குஜராத்தில் உள்ள அதன் ஹன்சல்பூர் ஆலையில் ரூ.21,000 கோடி முதலீடு செய்துள்ளது. இந்த ஆலை ஆண்டுக்கு 7.5 லட்சம் கார்களை உற்பத்தி செய்ய முடியும். 2026-ம் ஆண்டுக்குள் ஹன்சல்பூர் ஆலையில் 67,000 இ-விட்டாரா மின்சார கார்களை தயாரிக்க திட்டமிடப்பட்டுள்ளது.
