ஒடிசாவின் பூரி நகரத்தில் ஆண்டு தோறும் கோலாகலமாக நடைபெறும் ஜெகன்னாதர் கோயில் ரதயாத்திரை திருவிழா, இந்த ஆண்டும் அதே பரபரப்புடன் இன்று நடைபெற்றது. ஆயிரக்கணக்கான பக்தர்கள், உலகின் பல பகுதிகளில் இருந்து வந்து கலந்து கொண்டனர். ஜெகன்னாதர் மற்றும் அவரது சகோதரர்கள் பாலபத்ரா, சுபத்ரா ஆகியோர் தனித்தனி ரதங்களில் எழுந்தருளி, கோவிலிலிருந்து குண்டிசா மண்டபம் நோக்கி பிரம்மாண்ட யாத்திரை மேற்கொண்டனர். இந்த நிகழ்வில் பக்தர்கள் “ஜெய் ஜெகன்னாதா” என்று முழக்கம் எழுப்பி, 3 கிலோமீட்டர் வரை ரதங்களை இழுத்தனர்.
இந்த ஆண்டுக்கான விழாவில், பாதுகாப்பு நடவடிக்கைகள் முன்னதாகவே தீவிரமாக எடுக்கப்பட்டிருந்த போதிலும், அத்தனை பெரிய அளவிலான மக்கள் திரட்டைக் கட்டுப்படுத்துவது கடினமானதாக இருந்தது. பூரி நகரம் முழுவதும் திருவிழா சூழ்நிலை நிலவ, சுமார் 12 லட்சம் மக்கள் வருகை தந்துள்ளனர். அந்தளவுக்கு கூட்டம் திரண்ட நிலையில், ரத ஊர்வலத்தின் போது, குறிப்பாக பாலபத்ரரின் ரதத்தை இழுக்கும் நேரத்தில் திடீரென ஏற்பட்ட கூட்ட நெரிசலில் பலர் மயக்கமடைந்து கீழே விழுந்ததாக தகவல்கள் வெளியாகியுள்ளது.
இதன்காரணமாக, 500க்கும் மேற்பட்ட பக்தர்கள் காயமடைந்ததாக கூறப்படுகிறது. இவர்களில் பலருக்கு தற்காலிக சிகிச்சை அளிக்கப்பட்டு விட்டதாகவும், சிலரை மருத்துவமனைக்கு கொண்டு செல்ல வேண்டிய நிலை ஏற்பட்டதாகவும் கூறப்படுகிறது. தற்போதைய நிலையில், அரசு மற்றும் கோயில் நிர்வாகம் இது தொடர்பான அதிகாரப்பூர்வ அறிக்கையை வெளியிடவில்லை. ஆனால், சம்பவ இடத்திலிருந்து வரும் தகவல்களின்படி, விரைவில் முழுமையான விபரம் வெளியிடப்படும் என்று எதிர்பார்க்கப்படுகிறது.
பூரி ரதயாத்திரை, அனைத்து சாதி, சமுதாய மக்களும் மூன்று தெய்வங்களை நேரில் தரிசிக்க முடியும் ஒரே நேரம் என்பதால், இதனை “மஹா ஜனதா தரிசனம்” என்றும் அழைக்கப்படுகிறது. இந்த விழாவின் முக்கியத்துவம் பக்தி, கலாசாரம் மற்றும் பாரம்பரியம் அனைத்தையும் ஒருங்கிணைக்கும் விழாவாக இருப்பதே. இந்த ஆண்டில் ஏற்பட்ட கூட்ட நெரிசல் குறித்து அரசு துரித நடவடிக்கை எடுத்து பாதுகாப்பை மேலும் வலுப்படுத்தும் எதிர்பார்ப்பு நிலவுகிறது.
