புதுடெல்லி: நாடாளுமன்ற எதிர்க்கட்சித் தலைவர் ராகுல் காந்தி தனது வெளிநாட்டு பயணங்களில் பாதுகாப்பு நடைமுறைகளை பின்பற்றவில்லை என்று சிஆர்பிஎப் குற்றம் சாட்டியுள்ளது. இதற்காக காங்கிரஸ் தலைவர் மல்லிகார்ஜுன் கார்கேக்கும், ராகுல் காந்திக்கும் தனியாக கடிதம் அனுப்பியுள்ளதாக தகவல் வெளியாகியுள்ளது. அந்தக் கடிதம் பரபரப்பை ஏற்படுத்தி, பாஜக–காங்கிரஸ் இடையே வார்த்தைப் போருக்குத் தூண்டியுள்ளது.
சிஆர்பிஎப்பின் கடிதத்தில், “ராகுல் காந்தி Z+ பாதுகாப்பு வலையத்தில் உள்ளவர். அவருக்கு Advance Security Liaison எனும் சிறப்பு பாதுகாப்பு வழங்கப்படுகிறது. எந்தப் பயணத்தையும் மேற்கொள்ளும் முன் பாதுகாப்பு அமைப்புக்கு தகவல் தருவது கட்டாயம். ஆனால், பல தடவைகள் அவர் இந்த நடைமுறையை பின்பற்றவில்லை” என்று குறிப்பிடப்பட்டுள்ளது. வெளிநாட்டு பயணங்களுக்கு முன் முழு விவரங்களையும் பகிர வேண்டிய நிலையில், அதையும் அவர் புறக்கணித்ததாக குற்றஞ்சாட்டப்பட்டுள்ளது.
இத்தாலி, வியட்நாம், துபாய், கத்தார், லண்டன், மலேசியா உள்ளிட்ட பல நாடுகளுக்குச் சென்றபோது பாதுகாப்பு விதிகளை மீறியதாக சிஆர்பிஎப் குறிப்பிட்டுள்ளது. “மஞ்சள் புத்தகம்” எனப்படும் நடைமுறைகளின் படி VVIPக்கள் ஒவ்வொரு பயணத்தையும் முன்கூட்டியே தெரிவிக்க வேண்டும். ஆனால் ராகுல் அதை செய்யாததால், முழு பாதுகாப்பு அமைப்பும் பாதிக்கப்பட வாய்ப்பு உண்டு என சிஆர்பிஎப் எச்சரித்துள்ளது.
இந்த கடிதத்தை அடிப்படையாகக் கொண்டு பாஜக, “ராகுல் காந்தி பாதுகாப்பை தாமதமாக எடுத்துக்கொள்கிறார்” என விமர்சித்துள்ளது. மறுபுறம் காங்கிரஸ், “இது திட்டமிட்ட அரசியல் நடவடிக்கை. ராகுலின் விமர்சனங்களை திசைதிருப்ப பாஜக முயற்சி” என எதிர்வாதம் செய்துள்ளது. இந்நிலையில், சிஆர்பிஎப் அதிகாரப்பூர்வமாக எந்த விளக்கமும் வழங்காமல் இருப்பதால், விவகாரம் மேலும் சிக்கலாகியுள்ளது.
