ஜம்மு காஷ்மீரின் ஸ்ரீநகரில் நடைபெற்ற ஆபரேஷன் சிந்தூர் நடவடிக்கையின் பின்னர், பாதுகாப்புத்துறை அமைச்சர் ராஜ்நாத் சிங் ராணுவ வீரர்களை நேரில் சந்தித்து பாராட்டு தெரிவித்தார். நாட்டிற்காக உயிர் கொடுத்த வீரர்களுக்கு தலை வணங்குவதாகவும், அவர்கள் தியாகம் நாடு மறக்காது என்றும் கூறினார்.
ராணுவ வீரர்களிடையே உரையாற்றிய அவர், தான் பாதுகாப்புத்துறை அமைச்சராக இருந்தாலும், முதலில் ஒரு இந்திய குடிமகனாகவே இருக்கிறேன் என்று தெரிவித்தார். பயங்கரவாதிகளுக்கு எதிரான ஒவ்வொரு நடவடிக்கையும் தைரியமான முடிவுகளை எடுத்ததற்கான சான்று என அவர் கூறினார்.
பஹல்காம் தாக்குதலில் உயிரிழந்தவர்களுக்கு அஞ்சலி செலுத்திய ராஜ்நாத் சிங், பயங்கரவாதத்தை ஆதரிக்கும் பாகிஸ்தானிடம் அணு ஆயுதம் இருப்பது உலகத்துக்கு ஒரு பெரிய அச்சுறுத்தலாக உள்ளது என்றார். முரட்டுத்தனமான நாட்டு ஆட்சியாளர்களிடம் அந்த அளவிலான ஆயுதங்கள் இருக்கக் கூடாது என்றும், அந்த ஆயுதங்களை சர்வதேச அணு சக்தி முகமை தங்களது கட்டுப்பாட்டில் கொண்டு வர வேண்டும் என்றும் வலியுறுத்தினார்.
அணு ஆயுதங்களை வைத்து பாகிஸ்தான் மற்ற நாடுகளை அச்சுறுத்தும் சூழ்நிலையை உலக நாடுகள் கவனிக்க வேண்டும் என்றார். இதுபோன்ற சூழ்நிலையில், இந்திய ராணுவத்தின் துணிச்சலான பதிலடி நடவடிக்கையான ஆபரேஷன் சிந்தூர் நாட்டிற்கு பெருமையை ஏற்படுத்தி உள்ளது.
இந்த நடவடிக்கை பயங்கரவாதிகளுக்கு எச்சரிக்கையான செய்தியாக அமைந்துள்ளதாகவும், ராணுவத்தின் தைரியம் அனைவருக்கும் சாதகமாக இருப்பதாகவும் ராஜ்நாத் சிங் தெரிவித்துள்ளார். பிரதமர் மோடி தலைமையில் இந்த நடவடிக்கை வெற்றிகரமாக நடைபெற்றது என்பதைக் குறிப்பிடும் அவர், கடந்த நான்கு தசாப்தங்களில் நாடு சந்தித்த எல்லைத் தாக்குதல்களை நினைவுபடுத்தினார்.
இதேவேளை, ராணுவ தளபதி உபேந்திர திவேதி காஷ்மீர் பகுதிக்கு சென்று வீரர்களை நேரில் சந்தித்து வாழ்த்தினார். ஆபரேஷன் சிந்தூரின் போது பாகிஸ்தானுக்கு தக்க பதிலடி அளித்த வீரர்களின் செயலுக்கு பாராட்டுகள் தெரிவித்தார். பாதுகாப்பு படை எந்த சவாலையும் சமாளிக்க தயார் நிலையில் இருக்க வேண்டும் என்பதே தேசிய பாதுகாப்பின் அடித்தளமாக இருக்க வேண்டும் என அவர் குறிப்பிட்டார்.
