லக்னோ: உ.பி., மாநிலம் பிரயாக்ராஜ் நகரில் ஜனவரி 13ம் தேதி தொடங்கும் கும்பமேளா இந்த ஆண்டு சிறப்பான மாற்றத்துடன் நடைபெற உள்ளது. அன்றைய தினம், நான்கு சங்கராச்சாரியார்களும், 13 அகாரா அமைப்புகளின் தலைவர்களும், திரிவேணி சங்கமத்தில் கூடி, சனாதன வாரியம் அமைக்க தீர்மானம் நிறைவேற்ற உள்ளனர். இந்த தீர்மானத்தை மத்திய அரசுக்கு அனுப்பி சனாதன வாரியம் அமைக்க வலியுறுத்த திட்டமிடப்பட்டுள்ளது.
இந்தியாவில் சனாதன தர்மத்தை பாதுகாக்கவும், இந்து கோவில்கள் மற்றும் நிலங்களை மீட்கவும் இந்த வாரியம் அமைக்கப்பட வேண்டியது அவசியம். முஸ்லிம்களுக்கு வக்பு வாரியம் இருப்பது போல், இந்துக்களுக்கும் சனாதன வாரியம் அமைக்க வேண்டும் என்பது பல்வேறு தரப்பில் இருந்து கோரிக்கையாக இருந்து தற்போது முக்கிய விவாதமாக உள்ளது.
ஆங்கிலேயர் ஆட்சியில் 1913ல் வக்பு வாரியம் உருவாக்கப்பட்டது, பின்னர் 1923ல் முஸ்லிம் வக்ஃப் சட்டம் கொண்டு வரப்பட்டது.சுதந்திர இந்தியாவில் காங்கிரஸ் ஆட்சியில் 1954 மற்றும் 1995ல் வக்ஃபு வாரிய சட்டம் திருத்தப்பட்டது. இப்போது, இந்தியாவின் அனைத்து மாநிலங்களிலும் இந்த வாரியம் செயல்படுகிறது, மேலும் இது மதச்சார்பற்ற விரோதமாகவும் பார்க்கப்படுகிறது.
அதேபோல், இந்துக் கோயில்களை அரசாங்கத்தின் பிடியில் இருந்து விடுவித்து, இந்துக்களால் நிர்வகிக்கப்படுவதன் மூலம் சனாதன் வாரியம் இந்து சமூகத்தில் குறிப்பிடத்தக்க தாக்கத்தை ஏற்படுத்துவதாக நம்பப்படுகிறது. இது மத்திய அரசின் தீவிர கவனத்துக்கு வந்துள்ள வக்பு வாரியம் தொடர்பான கேள்விகளையும் எழுப்பியுள்ளது.
