ராஜஸ்தானின் ஜலாவரில் அமைந்துள்ள அரசுப் பள்ளியில் மேற்கூரை இடிந்து விழுந்ததில், ஏழு மாணவர்கள் உயிரிழந்த சம்பவம் இந்திய முழுக்க வருத்தத்தை ஏற்படுத்தியுள்ளது. பல வருடங்களாக பராமரிக்கப்படாத கட்டிடத்தில், தொடர்ந்து பெய்த மழையால் மேற்கூரை நனையத் தொடங்கியது. அதன்போது, எட்டாம் வகுப்பு மாணவி ஒருவர் “தண்ணீருடன் கூழாங்கற்கள் விழுகிறது” என ஆசிரியரிடம் தெரிவித்தும், அவர் அதை புறக்கணித்ததாக புகார் கூறியுள்ளார்.
விபத்து நேரத்தில் 35 மாணவர்கள் அந்த அறையில் இருந்தனர். குறுகிய நேரத்தில் மேற்கூரை இடிந்து விழ, மாணவர்கள் இடிபாடுகளுக்குள் சிக்கினர். அந்த அறைக்கு அருகில் இருந்த மற்றொரு அறையின் கூரும் விழுந்தது. பள்ளியில் மொத்தம் 73 மாணவர்கள் இருந்த நிலையில், 71 மாணவர்கள் வந்திருந்தனர். கிராம மக்கள் விரைந்து வந்து மாணவர்களை மீட்டனர். இதில் 5 பேர் சம்பவ இடத்திலேயே உயிரிழந்தனர்; மேலும் 2 பேர் மருத்துவமனையில் உயிரிழந்தனர். 27 பேர் காயமடைந்த நிலையில், 9 மாணவர்கள் ஆபத்தான நிலையில் உள்ளனர்.
விபத்துக்குப் பின்னர், கிராம மக்கள் சாலையை மறித்து போராட்டத்தில் ஈடுபட்டனர். அரசு தலையீட்டின் மூலம், இறந்த மாணவர்களின் குடும்பங்களுக்கு ரூ.1 கோடி இழப்பீடு மற்றும் வேலை வழங்க வேண்டும் என கோரிக்கை வைக்கப்பட்டது. மாவட்ட கல்வி அலுவலர் பணியிலிருந்து நீக்கப்பட்டார்; பள்ளி தலைமை ஆசிரியர் உள்ளிட்ட 5 ஆசிரியர்களும் இடைநீக்கம் செய்யப்பட்டனர். மாவட்ட ஆட்சியர் மீது கல்வித்துறை இயக்குநர் கடும் கண்டனம் தெரிவித்தார்.
இதுபோன்ற மனித வாழ்க்கையை இழக்கச் செய்யும் நிகழ்வுகள், பள்ளிக் கட்டிடங்களின் பாதுகாப்பு குறித்து அரசு துறைகளும், ஆசிரியர்களும் அதிக கவனம் செலுத்த வேண்டியதின் அவசியத்தை மீண்டும் ஒருமுறை உணர்த்துகின்றன.
