நாடு முழுவதும் ஆகஸ்ட் 15, 2025 வெள்ளிக்கிழமை அன்று 79வது சுதந்திர தினம் சிறப்பாக கொண்டாடப்படும் நிலையில், அதற்கு முன்னதாக குடியரசுத் தலைவர் திரௌபதி முர்மு, ஆகஸ்ட் 14 வியாழனன்று சன்நாயக நாட்டின் மக்களுக்கு உரையாற்றவுள்ளார். இந்த உரை, அவர் ஆற்றும் நான்காவது சுதந்திர தின உரையாகும்.
தொடர்ந்து இந்தியாவின் வளர்ச்சி, தேசிய ஒருமை மற்றும் எதிர்காலத் திட்டங்களைப் பற்றிய இந்த உரை, முதலில் இந்தியில் மற்றும் பின்னர் ஆங்கிலத்தில் ஒளிபரப்பப்படும். இரவு 7 மணிக்கு தூர்தர்ஷன் தொலைக்காட்சியின் முக்கிய சேனல்கள் வழியாக நேரலையில் ஒளிபரப்பப்படும். மேலும், YouTube உட்பட டிஜிட்டல் தளங்களிலும் இந்த உரையை நேரடியாக காணமுடியும்.
இதேபோல், பிராந்திய மொழியில் கேட்க விரும்புவோருக்காக தூர்தர்ஷன் மற்றும் ஆகாஷ்வாணி பிராந்திய சேனல்கள் வழியாக இரவு 9:30 மணிக்கு மொழிபெயர்க்கப்பட்ட உரைகள் ஒலிபரப்பப்படும். இது மக்கள் அனைவரும் தங்கள் சொந்த மொழியில் உரையின் முக்கியத்துவத்தை உணர்வதற்கான வாய்ப்பாகும்.
அடுத்த நாள் ஆகஸ்ட் 15 வெள்ளியன்று காலை, டெல்லியின் செங்கோட்டையில் நடைபெறும் தேசிய கொடியேற்ற விழாவில் பிரதமர் நரேந்திர மோடி பங்கேற்கிறார். விழாவில் காவல்துறை, ராணுவம் மற்றும் மாணவர்களின் அணிவகுப்பு இடம்பெறும். இந்த விழாவில் பிரதமர் மோடி தனது சுதந்திர தின உரையை ஆற்றுவார். கடந்த ஆண்டுகளில் இந்தியா அடைந்த முன்னேற்றங்களையும், எதிர்காலத்திற்கான அரசுத் திட்டங்களையும் அவர் தனது உரையில் விளக்குவார் என எதிர்பார்க்கப்படுகிறது.
