புதுடில்லி: மூன்று நாள் அரசுமுறை பயணமாக இந்தியா வந்துள்ள இலங்கை பிரதமர் ஹரிணி அமரசூரியா இன்று பிரதமர் நரேந்திர மோடியை சந்தித்து பல்வேறு முக்கிய அம்சங்கள் குறித்து ஆலோசனை நடத்தினார்.
இந்தியாவில் வந்தவுடன் ஹரிணி அமரசூரியாவுக்கு சிறப்பான வரவேற்பு அளிக்கப்பட்டது. பின்னர் அவர் மத்திய வெளியுறவுத்துறை அமைச்சர் எஸ். ஜெய்சங்கரை சந்தித்து இரு நாடுகளுக்குமிடையேயான உறவுகள் குறித்து விவாதித்தார். அதன்பின் டில்லி பல்கலைக்கழகத்தின் ஹிந்து கல்லூரி மாணவர்களுடன் கலந்துரையாடியும் பழைய நினைவுகளை பகிர்ந்துகொண்டார்.
இந்நிலையில் இன்று காலை பிரதமர் மோடியை அவர் சந்தித்து பேச்சுவார்த்தை நடத்தினார். கல்வி, பெண்கள் முன்னேற்றம், புதுமையான கண்டுபிடிப்புகள், மீனவர் நலன் போன்ற துறைகளில் இரு நாடுகளின் ஒத்துழைப்பை விரிவாக்குவது குறித்தும் முக்கிய விவாதங்கள் நடைபெற்றன. இரு நாட்டு மக்களின் வளர்ச்சிக்கும், பிராந்திய அமைதிக்கும் இந்தியா–இலங்கை ஒத்துழைப்பு அவசியம் என பிரதமர் மோடி தெரிவித்தார்.
இந்த சந்திப்பு, இலங்கை பிரதமராக ஹரிணி அமரசூரியா பொறுப்பேற்ற பின் இந்தியாவுக்கு அவருடைய முதல் விஜயம் என்பதாலும், இரு நாடுகளின் உறவில் புதிய வலுவான அத்தியாயமாகக் கருதப்படுகிறது. இந்தியா–இலங்கை நட்புறவு, வர்த்தகம் மற்றும் கடல் பாதுகாப்பு துறைகளில் எதிர்கால முன்னேற்றத்துக்கான முக்கிய அடித்தளமாக இந்தச் சந்திப்பு அமைந்துள்ளது.
