வாஷிங்டன்: ஜூன் மாதம் முதல் சர்வதேச விண்வெளி நிலையத்தில் சிக்கியுள்ள விண்வெளி வீராங்கனை சுனிதா வில்லியம்ஸ் அடுத்த ஆண்டு மார்ச் மாதம் பூமிக்கு திரும்புவார் என நாசா அறிவித்துள்ளது. பிப்ரவரி 2025-ல் அவர் பூமிக்கு திரும்புவார் என கடந்த ஆகஸ்ட் மாதம் நாசா கூறியிருந்தது. இந்நிலையில் தற்போது அவரது வருகை மேலும் தாமதமாகியுள்ளது.
நாசா விண்வெளி வீரர்களான நிக் ஹேக் மற்றும் ரஷ்ய விண்வெளி வீரர் அலெக்சாண்டர் கோர்புனோவ் ஆகியோருடன் சுனிதா வில்லியம்ஸ் மற்றும் புட்ச் வில்மோர் பிப்ரவரி மாதம் ஸ்பேஸ்எக்ஸ் டிராகன் க்ரூ-9 பயணத்தில் பூமிக்கு திரும்புவார்கள் என்று நாசா அறிவித்துள்ளது. இந்நிலையில், அதன் புறப்பாடு மேலும் தாமதமாகியுள்ளதாக தற்போது தகவல் வெளியாகியுள்ளது.
இதை நாசாவின் கமர்ஷியல் க்ரூ புரோகிராமின் மேலாளர் ஸ்டீவ் ஸ்டிச் உறுதி செய்துள்ளார். 8 நாள் பயணம் எப்படி பல மாத பயணமாக மாறியது? சுனிதா வில்லியம்ஸ் மற்றும் புட்ச் வில்மோர் ஆகியோர் ஜூன் 6-ம் தேதி அமெரிக்காவின் புளோரிடாவிலிருந்து ஸ்டார்லைனர் மூலம் சர்வதேச விண்வெளி நிலையத்திற்கு வந்தனர். அன்றிலிருந்து இன்றுவரை அங்கேயே இருக்கிறார்கள்.
அவர்கள் பயணம் செய்த போயிங் ஸ்டார்லைனர் விண்கலத்தில் ஏற்பட்ட தொழில்நுட்பக் கோளாறுதான் இதற்குக் காரணம். விண்வெளி நிலையத்தில் ஆறு மாதங்களுக்கும் மேலாக இருந்த இவர்களை மீண்டும் பூமிக்குக் கொண்டுவர நாசா பல்வேறு முயற்சிகளை மேற்கொண்டுள்ளது. ஆனால் அடுத்த ஆண்டு மார்ச் மாதத்தின் இரண்டாம் பாதியில்தான் அவை பூமிக்கு திரும்பும் என தெரிவிக்கப்பட்டுள்ளது.
