திருவனந்தபுரம்: கேரளாவில் கடந்த இருபது நாட்களாக நிற்கும் பிரிட்டனின் ‘எப்-35பி’ போர் விமானத்தை, பழுது சரிசெய்ய முடியாத நிலையில், பிரிட்டன் விமானப் படை அதை பத்திரமாக கழற்றி எடுத்துச் செல்ல தீர்மானித்துள்ளது. இந்த விமானம், அரபிக் கடலில் அமைந்துள்ள ராயல் நேவி போர்கப்பலில் இருந்து ஜூன் 14ஆம் தேதி புறப்பட்டு, எரிபொருள் பற்றாக்குறையால் திருவனந்தபுரம் விமான நிலையத்தில் அவசரமாக தரையிறங்கியது. இந்திய மத்திய அரசின் அனுமதியுடன், பாதுகாப்பு பரிசோதனைகள் முடிந்ததும் மீண்டும் புறப்பட்டு செல்ல திட்டமிட்டபோது, ஹைட்ராலிக் அமைப்பில் ஏற்பட்ட கோளாறு காரணமாக அது அங்கே நிலைத்துவிட்டது.
விமானத்தை சரிசெய்யும் நோக்கத்தில், மூன்று தொழில்நுட்ப வல்லுநர்கள் அடங்கிய ராயல் நேவி குழு இந்தியாவுக்கு அனுப்பப்பட்டது. பல நாள் முயற்சிகளுக்குப் பிறகும், பழுதை சரி செய்ய முடியாத சூழ்நிலை ஏற்பட்டது. விமானம் முழுமையாக செயலிழந்த நிலையில், அதை திருப்பி அனுப்ப வேண்டிய கட்டாயம் ஏற்பட்டது. ஒவ்வொன்றும் சுமார் ₹920 கோடி மதிப்புள்ள இந்த விமானம், பாதுகாப்பு ரீதியாக பெரும் முக்கியத்துவம் கொண்டது என்பதால், கவனத்துடன் பகுதி பகுதியாக உடைத்து எடுத்துச் செல்ல தீர்மானிக்கப்பட்டது.
இந்நிலையில், பிரிட்டன் விமானப் படையினர் சார்பில், விமானத்தை எடுத்துச் செல்ல தேவையான தொழில்நுட்பப் பயிற்சி பெற்ற குழு மற்றும் அதற்கான சரக்கு விமானம் நாளை திருவனந்தபுரம் வந்தடைவதாக அறிவிக்கப்பட்டுள்ளது. இந்த நடவடிக்கைகள் அனைத்தும் இந்திய பாதுகாப்பு மையங்களின் கண்காணிப்பில் நடைபெறுகின்றன. கடந்த இருபது நாட்களாக விமான நிலையத்தில் நிறுத்தப்பட்டிருந்த இந்த விமானம், தற்போது சர்வதேச கவனத்தைக் ஈர்த்துள்ள முக்கிய சம்பவமாக மாறியுள்ளது.
