புதுடில்லி: இந்தியாவின் மிகப்பெரிய ரயில் கனவாக கருதப்படும் புல்லட் ரயில் சேவை 2027ம் ஆண்டு ஆகஸ்ட் மாதம் தொடங்கும் என்று மத்திய ரயில்வே அமைச்சர் அஸ்வினி வைஷ்ணவ் தெரிவித்துள்ளார்.
மும்பை–ஆமதாபாத் இடையிலான 508 கிலோமீட்டர் நீள புல்லட் ரயில் திட்டம், பிரதமர் நரேந்திர மோடி தலைமையில் 2015ஆம் ஆண்டு அறிவிக்கப்பட்டது. ஜப்பான் தொழில்நுட்பத்தில் ரூ.2 லட்சம் கோடி செலவில் உருவாகும் இந்த அதிவேக ரயில், மொத்தம் 12 நிலையங்கள் வழியாக பயணிக்கும்.
குஜராத்தில் நடந்த கருத்தரங்கில் பேசிய அமைச்சர், “புல்லட் ரயில் திட்டப் பணிகள் வேகமாக முன்னேறி வருகின்றன. தண்டவாள அமைப்பு, மின்சாரம், நிலையங்கள் உள்ளிட்ட அனைத்தும் திட்டமிட்டபடி நடைபெறுகிறது. ஜப்பான் அரசின் பிரதிநிதிகளும் அண்மையில் பணிகள் குறித்து ஆய்வு செய்தனர். 2027 ஆகஸ்டில் மக்கள் பயன்பாட்டுக்காக சேவையை தொடங்குவதே எங்கள் இலக்கு” என்று கூறினார்.
இந்திய ரயில்வே வரலாற்றில் புதிய மைல் கல்லாக அமையவுள்ள இந்த புல்லட் ரயில், ஒரே நேரத்தில் நூற்றுக்கணக்கான பயணிகளை மிக குறைந்த நேரத்தில் ஒரு நகரிலிருந்து மற்றொரு நகருக்கு கொண்டு செல்லும் திறன் கொண்டது. இதன் மூலம் இந்தியாவின் போக்குவரத்து துறையில் புதிய யுகம் தொடங்கும் என நிபுணர்கள் மதிப்பிடுகின்றனர்.
