புதுடெல்லி: டெல்லியில் செய்தியாளர்கள் சந்திப்பில் பேசிய பாஜக தலைவரும், முன்னாள் மத்திய அமைச்சருமான ரவிசங்கர் பிரசாத், “ராகுல் காந்தி எங்கே? வியட்நாம் சென்றதாக கேள்விப்பட்டேன். புத்தாண்டு மற்றும் ஹோலி பண்டிகையின்போது ராகுல் வியட்நாமில் இருப்பதாக கூறப்படுகிறது. சுமார் 22 நாட்கள் அங்கு தங்கியிருக்கிறார் ராகுல்.
இத்தனை நாட்கள் தனது தொகுதியில் கூட செலவிடுவதில்லை. வியட்நாம் மீது அவருக்கு ஏற்பட்ட திடீர் காதலுக்கு காரணம் என்ன? ராகுல் அடிக்கடி அந்த நாட்டுக்கு செல்வது மிகவும் சுவாரஸ்யமானது. “முஸ்லீம் ஒப்பந்ததாரர்களுக்கு இடஒதுக்கீடு வழங்கும் கர்நாடக அரசின் முடிவின் பின்னணியில் ராகுல் காந்தி உள்ளார். எதிர்க்கட்சிகளுக்கு இடையே போட்டியாக இருக்கும் வகுப்புவாத மற்றும் வாக்கு வங்கி அரசியலில் காங்கிரஸை வழிநடத்த ராகுல் முயற்சிக்கிறார்.
அத்தகைய முடிவு சிறியதாகத் தோன்றலாம். ஆனால் இதுபோன்ற முன்னேற்றங்கள் தேசிய அளவில் கடுமையான தாக்கங்களை ஏற்படுத்துகின்றன,” என்று அவர் கூறினார். இதனிடையே ராகுலின் தனிப்பட்ட பயணங்களை பாஜக அரசியலாக்குவதாக காங்கிரஸ் குற்றம்சாட்டியுள்ளது. தனி நபராக வெளிநாடு செல்ல அவருக்கு உரிமை உண்டு என்றும் காங்கிரஸ் கூறியுள்ளது.
