மும்பை: அதெல்லாம் முடியாது… கோரிக்கைள் நிறைவேறும் வரை போராட்டம் தொடரும் என்று மராட்டிய பயிற்சி டாக்டர்கள் அமைப்பு திட்டவட்டமாக அறிவித்துள்ளது.
மேற்கு வங்காளத்தில் பெண் டாக்டர் பலாத்கார வழக்கில், கோரிக்கைள் அனைத்தும் நிறைவேறும் வரை போராட்டம் தொடரும் என மராட்டிய பயிற்சி டாக்டர்களுக்கான கூட்டமைப்பு அறிவித்து உள்ளது. மேற்கு வங்காள தலைநகர் கொல்கத்தாவின் வடபகுதியில் ஆர்.ஜி. கார் மருத்துவக்கல்லூரி மருத்துவமனை உள்ளது. இதில் பணியாற்றிய 31 வயது பயிற்சி பெண் டாக்டர் ஒருவர், கடந்த 9-ந்தேதி கொடூரமாக கொலை செய்யப்பட்டு கிடந்துள்ளார். அரை நிர்வாண கோலத்தில் உயிரிழந்த நிலையில் அவருடைய உடல் கண்டெடுக்கப்பட்டது.
இந்த சம்பவத்தில் சஞ்சய் ராய் என்பவரை போலீசார் கைது செய்தனர். அவர், 23-ந்தேதி வரை போலீஸ் காவலில் வைக்கப்பட்டு உள்ளார். இதனை தொடர்ந்து, பல்வேறு பகுதிகளிலும் பயிற்சி டாக்டர்கள் கூட்டமைப்பு போராட்டத்தில் ஈடுபட்டு வருகிறது. இந்த போராட்டம் நேற்று 2-வது நாளாகவும் நீடித்தது.
டாக்டர்கள் கூட்டமைப்பில் ஒரு பிரிவினர் போராட்டம் வாபஸ் பெறப்படும் என அறிவித்தனர். இந்நிலையில், மராட்டிய பயிற்சி டாக்டர்களுக்கான கூட்டமைப்பு தொடர்ந்து போராடுவது என முடிவு செய்துள்ளது. எங்களுடைய கோரிக்கைள் அனைத்தும் நிறைவேறும் வரை போராட்டம் தொடரும் என அறிவித்து உள்ளனர்.
