பெரும்பாலான பெண்கள் மாதவிடாய் காலத்தில் வலியை அனுபவிப்பது சாதாரணமானது போலத் தோன்றினாலும், சில சந்தர்ப்பங்களில் இது உடல்நல குறைபாடுகளுக்கான எச்சரிக்கையாக இருக்கலாம். குறிப்பாக, அந்த வலி, குமட்டல், வாந்தி, தலைச்சுற்றல் போன்ற தொல்லைகளுடன் சேர்ந்துவந்தால், உங்கள் அன்றாட வேலைகளையே செய்ய முடியாத நிலைக்கு கொண்டு செல்லும் அளவில் இருந்தால், அது சாதாரணம் அல்ல என்பதை கவனிக்க வேண்டும்.
மாதவிடாய் ஆரம்ப நாட்களில் சிறிய அளவிலான தசைப்பிடிப்பு என்பது, புரோஸ்டாக்லாண்டின் எனும் ஒரு கொழுப்பு சார்ந்த ஹார்மோனால் ஏற்படுகிறது. இது உடலில் வீக்கம் மற்றும் வலியைத் தூண்டலாம். ஆனால் இந்த வலி சில மணி நேரங்களோ அல்லது ஒரு நாளோ மட்டுமே நீடித்து பின்னர் குறைந்து விடும். இது பொதுவான நிலையாக இருக்கலாம்.
ஆனால் வலி தொடர்ந்து தீவிரமடைந்து, வாந்தி, குமட்டல் மற்றும் தலைசுற்றல் போன்ற அறிகுறிகளுடன் இணைந்து வந்தால், உடலில் ஏதோ தவறு நடக்கிறது என்பதை இது சுட்டிக்காட்டுகிறது. பலரும் இந்த வலியை பொறுத்து கொள்கிறார்கள் என்பதுதான் கவலையளிக்கும் விஷயம்.
இந்தக் கடுமையான வலிக்கு மிக பொதுவான காரணங்களில் ஒன்று எண்டோமெட்ரியோசிஸ். இதில் கருப்பை புறணியுடன் ஒத்த திசுக்கள் கருப்பையின் வெளியில் வளர்ந்துவிடும். இதனால் இடுப்பு வலி, வீக்கம் மற்றும் நிறைவில்லாத மாதவிடாய் உணர்வு ஏற்படலாம். இது காலப்போக்கில் அதிக பாதிப்பை ஏற்படுத்தும்.
அதேபோல், அடினோமயோசிஸ் என்றும் அழைக்கப்படும் ஒரு நிலை, கருப்பையின் புறணி அதன் தசைச் சுவருக்குள் வளர்வதைக் குறிக்கிறது. இது மிகுந்த வலி மற்றும் அதிக இரத்தப்போக்குக்கு வழிவகுக்கிறது. இதயப் போலவே, ஃபைப்ராய்ட்கள் எனப்படும் கருப்பைச் சுற்றியுள்ள வளர்ச்சிகளும் அழுத்தத்தை அதிகரித்து வலியை ஏற்படுத்தும்.
மேலும், பாகப்புள்ளி அழற்சி நோய் (PID) போன்ற தொற்று நிலைகளும், சிகிச்சை அளிக்கப்படாமல் விட்டுவிட்டால் நீண்டகால இடுப்பு வலியை ஏற்படுத்தும். இந்த நிலையில் ஹார்மோன் சமநிலையின்மை கூட ஒரு முக்கிய பங்கு வகிக்கிறது. இது கருப்பையின் சுருக்கங்களை அதிகப்படுத்தி வலியை கூர்மையாக்கும்.
மாதவிடாய் வலியைத் தொடர்ந்து புறக்கணிக்காமல் இருப்பது முக்கியம். இது உங்கள் வாழ்க்கை தரத்தையே பாதிப்பதோடு, இனப்பெருக்கம் சம்பந்தப்பட்ட செயல்களைத் தடுக்கும் வாய்ப்பும் உள்ளது. குறிப்பாக, எண்டோமெட்ரியோசிஸ் அல்லது PID போன்றவை நீண்ட காலத்துக்குப் பிறகு கருவுறுதலுக்கே பாதிப்பை ஏற்படுத்தும்.
இதற்கான தீர்வு, ஆரம்பத்திலேயே மருத்துவரை அணுகி சரியான பரிசோதனை மற்றும் சிகிச்சையை மேற்கொள்வதே. கருப்பை நிபுணரின் ஆலோசனையின்படி, வாழ்க்கை முறை மாற்றங்கள், மருந்துகள் அல்லது தேவைப்பட்டால் அறுவை சிகிச்சை போன்ற தீர்வுகள் பரிந்துரைக்கப்படும். வலியின் பின்னணியில் என்ன காரணம் உள்ளது என்பதை அறிந்து அதற்கேற்ப சிகிச்சை மேற்கொள்வதே நீண்டநாள் நிவாரணத்துக்கான ஒரே வழியாகும்.
