கோவை விமான நிலையத்தில் நேற்று அவர் நிருபர்களிடம் கூறியதாவது:- ‘யுகாதி’ பண்டிகை வாழ்த்துக்கள். தற்போது சென்னை – ராமேஸ்வரம் இடையே இரண்டு ரயில்கள் இயக்கப்படுகின்றன. மூன்றாவது ரயில் திருவாரூர், திருத்துறைப்பூண்டி, பட்டுக்கோட்டை உள்ளிட்ட பகுதிகளை இணைக்கிறது. மக்களின் நீண்ட நாள் கோரிக்கை நிறைவேற்றப்பட்டுள்ளது. கோயம்புத்தூரில் இருந்து ராமநாதபுரம், ராமேஸ்வரத்துக்கு ரயில் சேவை வழங்க வேண்டும். விரைவில் பரிசீலிப்பதாக மத்திய அமைச்சர் உறுதியளித்துள்ளார்.
கோவை – கரூர் இடையிலான சாலை விரிவாக்கத் திட்டத்தை மத்திய அரசு நிராகரிக்கவில்லை. திட்டத்திற்கு நிறைய பணம் தேவைப்படுகிறது. விரைவில் நல்ல செய்தி வரும் என்று நம்புகிறோம். ‘சி-ஓட்டர் சர்வே’ முடிவுகளின்படி, தமிழக முதல்வரின் ஆதரவு மக்கள் மத்தியில் குறைந்துள்ளது. அதை நான்கில் மூன்று பேர் நிராகரிப்பதாக கூறுகிறது. நாங்கள் நடத்திய கள ஆய்வு முடிவுகளும் அதையே கூறுகின்றன. தமிழகத்தில் ஒரு கட்சி வெற்றி பெற வேண்டுமானால், ஐந்து மண்டலங்களில் மூன்றில் வெற்றி பெற வேண்டும். இன்று தென் மாவட்டங்களில் விவசாயமும் தொழில்துறையும் நலிவடைந்துள்ளது.
கூட்டணி குறித்து எந்த கருத்தும் தெரிவிக்க விரும்பவில்லை. எந்த கட்சி மீதும், தலைவர் மீதும் எனக்கு கோபம் இல்லை. நான் யாருக்கும் எதிரானவன் அல்ல. எனவே பொறுத்திருந்து பாருங்கள். டெல்லியில் பேசியபோது, தன்னார்வலராக பணியாற்ற தயாராக உள்ளேன். அண்ணாமலை பதவிக்காக அரசியலுக்கு வரவில்லை. தமிழகத்தில் மாற்றத்தை ஏற்படுத்த வேண்டும். ஆகஸ்ட் 25, 2020 அன்று நான் கட்சியில் இணைந்ததில் இருந்து அதே உணர்வுடன் இருக்கிறேன்.
இந்தியப் பிரதமர் தனது இலங்கைப் பயணத்தை ஏப்ரல் 6-ம் தேதி முடித்துக் கொண்டு தமிழ்நாடு திரும்புகிறார். புதிய பாம்பன் பாலத்தைத் திறந்து வைக்கிறார். கோவிலுக்குச் சென்று வழிபாடு செய்த பின், அரசு ஏற்பாடு செய்துள்ள பொதுக்கூட்டத்தில் கலந்து கொண்டு புதிய திட்டங்கள் குறித்த அறிவிப்புகளை வெளியிட்டுவிட்டு திரும்புவார். மக்களவைத் தேர்தலுக்குப் பிறகு பிரதமர் நரேந்திர மோடி முதல்முறையாக தமிழகம் வருகிறார். அதற்கான ஏற்பாடுகளை சிறப்பாக செய்து வருகிறோம்.
யாருக்கும் எந்த பிரச்சனையும் ஏற்படுத்த மாட்டேன். நான் மாற்றி மாற்றி பேசுபவன் இல்லை. “தமிழ்நாடு தான் எனக்கு முன்னுரிமை. பா.ஜ.க.,வின் வளர்ச்சி தான் முக்கியம். எனது தனிப்பட்ட வளர்ச்சியோ, மற்றவர்களின் வளர்ச்சியோ முக்கியமில்லை,” என கூறியுள்ளார்.
