சென்னை: பிரதமர் மோடி தமிழகம் வருவதற்கு எதிர்ப்பு தெரிவித்து காங்கிரஸ் கருப்புக்கொடி போராட்டம் நடத்தும் என்று தமிழ்நாடு காங்கிரஸ் கமிட்டித் தலைவர் செல்வப்பெருந்தகை அறிவித்துள்ளார். இரண்டு நாள் பயணமாக தமிழகம் வரும் பிரதமர் நரேந்திர மோடி, ரூ.4,800 கோடி மதிப்பிலான பல்வேறு திட்டப் பணிகளை தொடங்கி வைக்க உள்ளார்.
பிரிட்டன் மற்றும் மாலத்தீவு சுற்றுப்பயணத்தை முடித்துக்கொண்டு பிரதமர் நரேந்திர மோடி இன்று இரவு தமிழகம் வருகிறார். இன்று இரவு 7.30 மணிக்கு மாலத்தீவிலிருந்து புறப்பட்டு, தனி விமானம் மூலம் தூத்துக்குடி விமான நிலையத்திற்கு வருகிறார். தமிழக முதல்வர் மு.க. ஸ்டாலின் மருத்துவமனையில் இருப்பதால், தமிழக அரசு சார்பாக மூத்த அமைச்சர்கள் பிரதமரை வரவேற்பார்கள்.
ஆளுநர் ஆர்.என். ரவி மற்றும் பாஜக மூத்த தலைவர்களும் அவரை வரவேற்பார்கள். தொடர்ந்து, தூத்துக்குடி விமான நிலையத்தில் ரூ.452 கோடி மதிப்பீட்டில் விரிவாக்கம் செய்யப்பட்ட புதிய முனையத்தை இரவு 8 மணிக்கு மோடி திறந்து வைப்பார். பின்னர், ரூ.4,800 கோடி மதிப்பிலான பல்வேறு திட்டப் பணிகளை அவர் தொடங்கி வைப்பார். 4,800 கோடி ரூபாய் செலவில் தொடங்கப்பட்டது. பின்னர், பிரதமர் மோடி இன்று இரவு தூத்துக்குடியில் இருந்து விமானம் மூலம் திருச்சிக்கு வருகிறார்.
மாவட்ட ஆட்சியர் அலுவலகம் அருகே உள்ள தனியார் நட்சத்திர சொகுசு ஹோட்டலில் இரவு தங்கி, நாளை காலை 11 மணிக்கு ஹெலிகாப்டர் மூலம் அரியலூருக்கு புறப்படுகிறார். அங்கு, கங்கைகொண்ட சோழபுரத்தில் நடைபெறும் முதலாம் ராஜேந்திர சோழனின் 1000-வது பிறந்தநாள் விழாவான ஆடி திருவாதிரை விழாவில் பங்கேற்று, ராஜேந்திர சோழன் நினைவு நாணயத்தை வெளியிடுவார். இந்த நிகழ்வில் தமிழக ஆளுநர் ஆர்.என்.ரவி மற்றும் பலர் பங்கேற்பார்கள். பிரதமர் மோடியின் வருகையை முன்னிட்டு தூத்துக்குடி, அரியலூர் மற்றும் திருச்சி மாவட்டங்களில் பாதுகாப்பு பலப்படுத்தப்பட்டுள்ளது.
இந்த சூழ்நிலையில், பிரதமர் மோடிக்கு எதிராக காங்கிரஸ் சார்பில் கருப்புக் கொடி போராட்டம் நடத்தப்படும் என்று தமிழ்நாடு காங்கிரஸ் கமிட்டித் தலைவர் செல்வப்பெருந்தகை அறிவித்துள்ளார். இன்று செய்தியாளர்களைச் சந்தித்த தமிழ்நாடு காங்கிரஸ் கமிட்டித் தலைவர் செல்வ பெருந்தகை, “பிரதமர் மோடியின் தமிழக வருகையை எதிர்த்து காங்கிரஸ் கட்சி சார்பில் கருப்புக் கொடி போராட்டம் நடத்தப்படும். பிரதமர் மோடி வருகை தரும் அனைத்து மாவட்டங்களிலும் கருப்புக் கொடி காட்டப்படும். தமிழகத்தின் நலனை தொடர்ந்து புறக்கணித்து வரும் பிரதமர் மோடி, அடுத்த தலைமுறையை உருவாக்கும் பள்ளிக் கல்விக்கு வழங்க வேண்டிய நிதியை வழங்க மறுத்து வருகிறார்.
கீழடி அகழ்வாராய்ச்சியின் உண்மையான அறிக்கையை வெளியிட மத்திய அரசு மறுத்து வருகிறது. இதையெல்லாம் கண்டித்து காங்கிரஸ் சார்பில் அந்தந்த மாவட்டங்களில் கருப்புக் கொடி காட்டுவோம்” என்று தெரிவித்தார். முன்னதாக, பிரதமர் மோடியின் தமிழக வருகையை எதிர்த்து ஜூலை 27-ம் தேதி சென்னையில் கருப்புக் கொடி போராட்டம் நடத்தப்படும் என்று மே 17 இயக்கம் அறிவித்திருந்தது. தொடர்ந்து தமிழகத்தை ஏமாற்றி வரும் மோடியின் தமிழக வருகையைக் கண்டித்து மே 17 இயக்கம் கருப்புக் கொடி போராட்டம் நடத்தும் என்று அறிவிக்கப்பட்டுள்ளது.
