சென்னை: தவெகவின் முதல் மாநாட்டில் நடிகர் விஜய் பேசியதற்கும், நேற்றைய கூட்டத்தில் தீர்மானங்கள் நிறைவேற்றப்பட்டதற்கும் விமர்சனங்கள் எழுந்தாலும், திமுகவினர் நேரடியாக பதிலளிக்காமல் நடிகர் விஜய்யின் அடுத்தடுத்த செயல்பாடுகளை உன்னிப்பாக கவனித்து வருவதாக கூறப்படுகிறது. தமிழகத்தில் ஆளும் திமுக கடந்த பல மாதங்களாக அடுத்த சட்டமன்ற தேர்தலுக்கு தயாராகி வருகிறது.
வரும் 2026-ம் ஆண்டு தேர்தலில் 200 தொகுதிகளுக்கும் இலக்கு நிர்ணயிக்கும் வகையில் முதல்வர் மு.க.ஸ்டாலினும், துணை முதல்வர் உதயநிதி ஸ்டாலினும் கட்சியினரை அவ்வப்போது சந்தித்து பேசி வருகின்றனர். 2021 சட்டப் பேரவைத் தேர்தல் மற்றும் சமீபத்தில் நடந்து முடிந்த மக்களவைத் தேர்தல்கள் மட்டுமின்றி, இதற்கு முந்தைய பல்வேறு தேர்தல்களிலும் தமிழகத்தில் திமுக தனது இருப்பை உறுதியாக நிரூபித்துள்ளது.
பிரதான எதிர்க்கட்சியான அதிமுகவின் பலவீனத்தையும், தங்கள் கூட்டணியின் பலத்தையும் நம்பி அடுத்த தேர்தலை சந்திக்க திமுக தயாராகி வந்தது. இந்நிலையில்தான் நடிகர் விஜய் சமீபத்தில் தனது தமிழக வெற்றி கழகத்தின் முதல் மாநில மாநாட்டை நடத்தினார். இந்த மாநாட்டில் நடிகர் விஜய் திமுகவை நேரடியாக விமர்சித்ததுடன், திமுக அரசியல் எதிரி என்றும் திராவிடர் கழகத்தை குறிப்பிட்டு பேசினார்.
கொள்கை அளவில் பாஜகவை எதிர்ப்பதாகவும் அவர் கூறினார். மேலும், திமுக கூட்டணி கட்சிகளிடையே ஆட்சிப் பங்கீடு தொடர்பாக சமீபகாலமாக சலசலப்பு நிலவி வரும் நிலையில், தங்களுடன் கூட்டணி வைத்தால் ஆட்சியைப் பகிர்ந்து கொள்ளும் என விஜய் அறிவித்திருப்பது அரசியல் வட்டாரத்தில் பேசுபொருளாக மாறியுள்ளது. ஆனால், விஜய்யின் விமர்சனத்துக்கு அமைச்சர் எஸ்.ரகுபதியைத் தவிர திமுகவின் மற்ற முக்கியத் தலைவர்கள் யாரும் பெரிதாக எதிர்வினையாற்றவில்லை. அதைத்தொடர்ந்து நடந்த திமுக தேர்தல் பார்வையாளர்கள் கூட்டத்தில், நடிகர் விஜய்யை விமர்சித்ததை யாரும் பேச வேண்டாம், நாங்கள் பார்த்துக்கொள்வோம், அதனால் யாரும் பேச வேண்டாம் என முதல்வர் ஸ்டாலினும், துணை முதல்வர் உதயநிதியும் கூறியதாக நிர்வாகிகள் தெரிவித்தனர்.
ஆனால், நேற்று நடந்த செயற்குழு கூட்டத்தில், அரசின் பழிவாங்கும் நடவடிக்கைகளையும், ஆளும் திமுக உள்ளிட்ட மக்கள் விரோத சக்திகளின் அணுகுமுறையையும் எதிர்த்து தீர்மானம் நிறைவேற்றப்பட்டுள்ளது. இந்நிலையில், தி.மு.க.,வின் அடுத்தக்கட்ட நடவடிக்கை என, தி.மு.க., நிர்வாகிகள் கூறியதாவது:- தமிழகத்தில், தி.மு.க.,வின் முக்கிய எதிரி, அ.தி.மு.க., தான். விஜய் இப்போது முதல் மாநாட்டை நடத்தியுள்ளார். அதன் பிறகு செயற்குழு கூட்டத்தையும் நடத்தினார்.
அவரது அடுத்தடுத்த நடவடிக்கைகளுக்கு தலைமை பதிலளிக்கும். தற்போதைய சூழலில் கட்சி கட்டமைப்பை வலுப்படுத்தும் முயற்சிகளில் தலைமை இறங்கியுள்ளது. முதல்வர், துணை முதல்வர் ஆகியோர் தங்களது சுற்றுப்பயணங்கள் மூலம் அரசு நிகழ்ச்சிகளில் பங்கேற்று நிர்வாகிகளை சந்தித்து ஆலோசனை நடத்துகின்றனர். அதன்பிறகு, டிசம்பர் அல்லது ஜனவரி இறுதிக்குள் கட்சியின் நிர்வாக மாவட்டங்களில் பெரிய மாற்றம் ஏற்படும். இவ்வாறு கூறினார்கள்.
