மாட்ரிட்: ஸ்பெயின் தலைநகர் மாட்ரிட்டில் அந்நாட்டு பிரதிநிதிகளுடனான சந்திப்பில் கலந்து கொண்ட கனிமொழி தலைமையிலான இந்திய எம்.பி.க்கள் குழு, பயங்கரவாதத்திற்கு பாகிஸ்தான் ஆதரவளிப்பது குறித்து தங்கள் நிலைப்பாட்டை வெளிப்படுத்தியது. இதைத் தொடர்ந்து, தி.மு.க எம்.பி. கனிமொழி பாகிஸ்தானுடனான மோதல்களைத் தீர்ப்பதில் உள்ள சிக்கலான தன்மை குறித்துப் பேசினார். “இந்திய அரசாங்கம் பிரதிநிதிகளை அனுப்பியுள்ளது.
மேலும், நட்பு நாடுகள் மற்றும் பல்வேறு நாடுகளுடன் பேசுவதன் மூலம், பாகிஸ்தானை ஒரு காபிக்கு அழைப்பது இந்த மோதல்களை முடிவுக்குக் கொண்டு வந்து பிரச்சினைகளைத் தீர்க்கும் என்ற தவறான கருத்தைக் கொண்ட நாடுகளையும் நாங்கள் தொடர்பு கொண்டுள்ளோம். பாகிஸ்தான் பிரச்சினை பலர் பார்ப்பதை விட அதிகம். ” அவரது கருத்துக்கள் பாகிஸ்தான் பிரச்சினையில் இந்தியா எதிர்கொள்ளும் சவால்களை எடுத்துக்காட்டுகின்றன.
கூட்டத்தில் பேசிய ஆம் ஆத்மி கட்சி எம்.பி. அசோக் குமார் மிட்டல், “இங்கிலாந்தாக இருந்தாலும் சரி, பிரான்சாக இருந்தாலும் சரி, உலகில் நடக்கும் ஒவ்வொரு பயங்கரவாத சம்பவத்திலும் பாகிஸ்தான் ஈடுபட்டுள்ளது. பிரதமர் மோடி வாஸ்துதைவ குடும்பகத்தில் நம்பிக்கை கொண்டுள்ளார். நாங்கள் அமைதியை விரும்புகிறோம், நாங்கள் வளர விரும்புகிறோம், மற்றவர்களையும் வளர விட விரும்புகிறோம்,” என்று அவர் கூறினார். சமாஜ்வாடி கட்சி எம்.பி. ராஜீவ் ராய், “பாகிஸ்தான் 1947-ல் பிறந்தது, அவர்கள் காஷ்மீரைத் தாக்கினர், பின்னர் 1965-ல் இந்தியாவைத் தாக்கினர்.
உலகில் எங்கும் ஒரு இராணுவம் அதன் சொந்தப் பெண்களையும் மக்களையும் கொன்று, ஊனப்படுத்தி, பாலியல் பலாத்காரம் செய்வதை நீங்கள் பார்க்க மாட்டீர்கள். பாகிஸ்தான் கிழக்கு பாகிஸ்தானில் இதைச் செய்தது, அது இப்போது வங்கதேசம்” என கூறினார் பாஜக எம்.பி. கேப்டன் பிரிஜேஷ் சௌதா, “இது பாகிஸ்தான் ஆதரவு பெற்ற அரசு பயங்கரவாதம். இன்று, நாம் அதன் பலியாகலாம்; நாளை, உலகம் அதன் பலியாகலாம். இந்தியா உட்கார்ந்து பேச வேண்டும் என்று பல நாடுகள் கூறுகின்றன. கேள்வி என்னவென்றால், யாருடன் பேசுவது என்பதுதான்.
பாகிஸ்தானில் தேர்ந்தெடுக்கப்பட்ட அரசாங்கத்துடன் நாம் பேச வேண்டுமா? அல்லது அங்குள்ள இராணுவத்துடன் பேச வேண்டுமா? அல்லது இஸ்லாமிய மதகுருக்களுடன் பேச வேண்டுமா?” என்று அவர் கேட்டார். ஜம்மு காஷ்மீரில் பஹல்காம் தாக்குதலைத் தொடர்ந்து, இந்திய பிரதிநிதிகள் சர்வதேச நாடுகளுக்குச் சென்று பாகிஸ்தான் பயங்கரவாதத்திற்கு ஆதரவளிப்பதை உலகிற்கு அம்பலப்படுத்தவும், ‘ஆபரேஷன் சிந்தூர்’ போன்ற இந்தியாவின் தற்காப்பு உரிமையை முன்னிலைப்படுத்தவும் சென்றுள்ளனர். திமுக எம்.பி. கனிமொழி தலைமையிலான குழு, இந்த நோக்கத்திற்காக உருவாக்கப்பட்ட 7 அனைத்துக் கட்சிக் குழுக்களில் ஒன்றாகும்.
கனிமொழி தலைமையிலான இந்திய எம்.பி.க்கள் குழுவில் ராஜீவ் ராய் (சமாஜ்வாதி), மியான் அல்தாப் அகமது (ஜம்மு காஷ்மீர் தேசிய மாநாடு), பிரிஜேஷ் சவுதா (பாஜக), பிரேம் சந்த் குப்தா (ராஷ்ட்ரிய ஜனதா தளம்), அசோக் குமார் மிட்டல் (ஆம் ஆத்மி கட்சி), முன்னாள் தூதர் ஜாவேத் அஷ்ரப் ஆகியோர் இடம்பெற்றுள்ளனர்.
