டெல்லி: சமீபத்தில் நடந்து முடிந்த டி20 உலகக் கோப்பை தொடரை இந்திய அணி கைப்பற்றியதை அடுத்து சர்வதேச டி20 போட்டிகளில் இருந்து ஓய்வு பெறுவதாக கிரிக்கெட் வீரர் ரவீந்திர ஜடேஜா அறிவித்தார்.
இந்நிலையில் அவர் பாஜகவில் இணைந்துள்ளார். கடந்த 2-ம் தேதி பாஜக உறுப்பினர் சேர்க்கைக்கான சிறப்பு முகாம் நடத்தப்பட்டது.
அன்றைய தினம் பிரதமர் நரேந்திர மோடி தனது கட்சி உறுப்பினரை புதுப்பித்துக்கொண்டார். இந்த சிறப்பு முகாமில் ரவீந்திர ஜடேஜா பாஜகவில் இணைந்துள்ளார்.
இந்தத் தகவலை அவரது மனைவியும் பாஜக எம்எல்ஏவுமான ரிவாபா ஜடேஜா தனது எக்ஸ் தளத்தில் பதிவிட்டுள்ளார். ஜடேஜாவின் மனைவி ரிவாபா ஜடேஜா 2019-ம் ஆண்டு பாஜகவில் இணைந்தார்.
இதைத் தொடர்ந்து 2022-ம் ஆண்டு குஜராத் சட்டப் பேரவைத் தேர்தலில் ஜாம்நகர் வடக்குத் தொகுதியில் போட்டியிட்டார். அவருக்கு ஆதரவாக ரவீந்திர ஜடேஜா பிரசாரம் செய்தார். அந்த தேர்தலில் தன்னை எதிர்த்து போட்டியிட்ட ஆம் ஆத்மி கட்சி வேட்பாளரை விட 50 ஆயிரத்துக்கும் மேற்பட்ட வாக்குகள் வித்தியாசத்தில் ரிவாபா வெற்றி பெற்றார் என்பது குறிப்பிடத்தக்கது.
ரவீந்திர ஜடேஜா தனது மனைவிக்கு ஆதரவாக பிரச்சாரம் செய்துள்ளார், ஆனால் பாஜகவில் இதுவரை எந்த பதவியையும் வகிக்கவில்லை. இந்நிலையில், தனது கணவர் ரவீந்திர ஜடேஜா பாஜகவில் இணைந்துள்ளதாக ரிவாபா முறைப்படி அறிவித்துள்ளார்.
பாஜக உறுப்பினர் சேர்க்கை பிரச்சாரத்தை தனது வீட்டில் இருந்தே தொடங்கியுள்ளதாக ரிவாபா கூறியுள்ளார்.
