மதுரை: மதுரை ஐராவதநல்லூரில் மண்டல திமுக தகவல் தொழில்நுட்ப குழு ஆய்வு மற்றும் ஆலோசனை கூட்டம் இன்று நடைபெற்றது. தெற்கு மாவட்டச் செயலர் மு.மணிமாறன் தலைமை வகித்தார். வடக்கு மாவட்ட செயலாளரும் அமைச்சருமான பி.மூர்த்தி, கோ.தளபதி முன்னிலை வகித்தனர். வட்டார பொறுப்பாளர் பிரபு வரவேற்றார். இதில் திமுக மாநில தகவல் தொழில்நுட்ப அணி செயலாளரும், தொழில், முதலீட்டு ஊக்குவிப்பு மற்றும் வணிகத்துறை அமைச்சருமான டி.ஆர்.பி.ராஜா கலந்து கொண்டு ஆலோசனைகளை வழங்கினார்.
பின்னர், செய்தியாளர்களிடம் அவர் கூறியதாவது:- தமிழக முதல்வர் மற்றும் துணை முதல்வரின் செயல்பாடுகளை மக்களுக்கு தெரிவிக்க போதிய அவகாசம் இல்லை. புதிதாக கட்சியில் சேரும் இளைஞர்களிடம் கட்சியின் கொள்கைகளை கொண்டு செல்லும் பணி நடந்து வருகிறது. அவதூறு பரப்புவதாக திமுக தகவல் தொழில்நுட்ப அணியினர் கூறுவது முற்றிலும் தவறு. 2026-ல் அதிமுக கூட்டணி மகத்தான வெற்றி பெறும் என்று அதிமுக பொதுச்செயலாளர் பழனிசாமி கூறுகிறார். முதலில் அவரை தூக்கத்தில் இருந்து எழுப்ப சொல்லுங்கள்.
2026 சட்டமன்றத் தேர்தலுக்கான பணிகளை ஐடி அணி சார்பில் தொடங்கினோம். 200 இடங்கள் வெற்றி இலக்கு என தமிழக முதல்வர் அறிவித்துள்ளார். ஆனால், 234 தொகுதிகளிலும் திமுக கூட்டணி வெற்றி பெறும் வகையில் ஐடி அணி நடவடிக்கை எடுத்து வருகிறது. 2026 தேர்தலில் வரலாறு காணாத வெற்றி பெற்று தமிழக முதல்வராக ஸ்டாலின் பொறுப்பேற்கவுள்ளார். ஒரே நாடு ஒரே தேர்தல் என்ற பிற்போக்குத்தனமான பிஜேபியின் சித்தாந்தத்திற்கு எதிராக இந்தியாவிலேயே முதன்முதலாக முன் வந்து நின்று போராடியவர் தமிழக முதல்வர்.
பாஜகவின் இந்த திட்டத்திற்கு திமுக முற்றிலும் எதிரான நிலைப்பாட்டை எடுத்துள்ளது. இந்தியாவின் அடுத்த தலைமுறையை வளர்க்கும் தேசியத் தலைவராக உருவெடுத்து இந்தியாவின் வளர்ச்சியைப் பற்றி சிந்திக்கிறார். மதுரையில் தனித்துவம் மிக்க பிரமாண்டமான தலைப்புப் பூங்கா அமைப்பதற்கான அடிக்கல் நாட்டு விழாவை முதல்வர் தொடங்கி வைக்கிறார்.
தென்னிந்தியாவில் பெரிய அளவில் வேலைவாய்ப்பை உருவாக்கும் சிப்காட் தொழில் பூங்கா மதுரை அருகே அமைக்கப்படும். தமிழகத்தின் வளர்ச்சியை உலகமே உன்னிப்பாக கவனித்து வருகிறது. உலக முதலீட்டாளர்கள் இந்தியாவில் முதலீடு செய்வதற்கு தமிழகத்தில் தற்போது சாதகமான சூழல் நிலவுகிறது. அபரிமிதமான தொழில் வளர்ச்சியும், பெரிய அளவில் வேலைவாய்ப்பும் ஏற்படும். இதன் மூலம் டிரில்லியன் டாலர் வர்த்தகம் என்ற தமிழக முதல்வரின் கனவு நிச்சயம் நிறைவேறும்’’ என்றார்.
