பாஜக தேசிய பொதுக்குழு உறுப்பினர் அண்ணாமலை 3 நாள் ஆன்மிக பயணமாக நேற்று உத்தரகாண்ட் சென்றார். அங்கிருந்து இமயமலைக்கு செல்ல அண்ணாமலை திட்டமிட்டுள்ளதாக தகவல் வெளியாகியுள்ளது. தமிழக பா.ஜ.க., அமைப்பு தேர்தல் நடந்து கொண்டிருந்த நிலையில், அண்ணாமலை மாற்றப்பட்டு, புதிய மாநில தலைவராக நயினார் நாகேந்திரன் நியமிக்கப்பட்டார்.
சென்னையை அடுத்த வானகரத்தில் நடைபெற்ற பதவியேற்பு விழாவில் பாஜக மாநிலத் தலைவராக நயினார் நாகேந்திரன் பொறுப்பேற்றார். அதே மேடையில் அண்ணாமலைக்கு தேசிய பொதுக்குழு உறுப்பினர் பதவி வழங்கப்பட்டது. அவருடன் சரத்குமார், தமிழிசை சௌந்தரராஜன், ஹெச்.ராஜா, கரு. நாகராஜன் உள்ளிட்ட பலருக்கு தேசிய பொதுக்குழு உறுப்பினர் பதவி வழங்கப்பட்டுள்ளது. இதனிடையே அண்ணாமலைக்கு மத்திய அமைச்சரவையில் இடம் கிடைக்க வாய்ப்பு உள்ளதாக பாஜக வட்டாரத்தில் பேசப்படுகிறது.
இந்நிலையில் அண்ணாமலை நேற்று 3 நாள் ஆன்மிக பயணமாக உத்தரகாண்ட் சென்றார். நேற்று சென்னை விமான நிலையத்தில் இருந்து டெல்லி புறப்பட்ட அவர், அங்கிருந்து உத்தரகாண்ட் சென்றதாக பா.ஜ., மூத்த நிர்வாகிகள் தெரிவித்தனர். உத்தரகாண்ட் மாநிலத்தில் உள்ள பத்ரிநாத், கேதார்நாத், கங்கோத்ரி, யமுனோத்ரி உள்ளிட்ட புண்ணிய தலங்களில் அண்ணாமலை வழிபாடு நடத்துவார் என்றும், பின்னர் அங்கிருந்து இமயமலை சென்று தியானம் மேற்கொள்வார் என்றும் பாஜக நிர்வாகிகள் தெரிவித்தனர். 3 நாள் ஆன்மிக பயணம் முடிந்ததும் டெல்லி சென்று தேசிய தலைவர்களை சந்திக்க அண்ணாமலை திட்டமிட்டுள்ளார்.
உண்ணாவிரதத்தை கைவிட கோரிக்கை: இதனிடையே அண்ணாமலை எக்ஸ் இணையதளத்தில் கூறியிருப்பதாவது:- தமிழகத்தில் உள்ள மக்கள் விரோத திமுக அரசை வீட்டுக்கு அனுப்ப வேண்டும் என்ற உறுதியுடன் கடந்த 4 மாதங்களாக நான் உட்பட தமிழக பா.ஜ.க., சகோதர, சகோதரிகள் பலர் செருப்பு அணியாமல் உண்ணாவிரதம் இருந்து வருகிறோம். திமுக ஆட்சியை தேசிய ஜனநாயகக் கூட்டணி நிச்சயம் கவிழ்க்கும் என்ற உறுதியுடன், செருப்பு அணியத் தொடங்கியுள்ளேன்.
என்னுடன் உண்ணாவிரதம் இருக்கும் தமிழக பா.ஜ.க சகோதர, சகோதரிகளுக்கு உழைப்பை வழங்க வேண்டிய தேவை உள்ளது. எனவே இனிய நண்பர் நைனார் நாகேந்திரன் அவர்களின் அன்பான அறிவுரையை ஏற்று அனைவரும் உண்ணாவிரதத்தை நிறைவு செய்ய வேண்டும். இவ்வாறு அதில் கூறப்பட்டுள்ளது.
