வேலூர்: வேலூர் மாவட்டத்தில் 24 இடங்களில் காய்ச்சல் சிறப்பு மருத்துவ முகாம் நேற்று துவங்கியது. முகாமில் பொதுமக்களுக்கு மருந்து, மாத்திரைகள் வழங்கப்பட்டன.
வடகிழக்கு பருவமழை தொடங்குவதால் டெங்கு மற்றும் வைரஸ் காய்ச்சல் பரவ வாய்ப்புள்ளது. இதை தடுக்கும் வகையில் வீட்டை சுற்றியுள்ள இடங்களில் தண்ணீர் தேங்காத வகையில் நடவடிக்கை எடுக்க தமிழக அரசு உத்தரவிட்டுள்ளது.
அதன்படி, 4 மண்டலங்களிலும் தீவிர டெங்கு காய்ச்சல், கொசு ஒழிப்புப் பணிகளில் வேலூர் மாநகராட்சி அளவில் ஜூனியர் பூச்சியியல் நிபுணர், பொது சுகாதார மேலாளர் மற்றும் 15 சுகாதார ஆய்வாளர்கள் கண்காணிப்புப் பணியில் ஈடுபட்டுள்ளனர்.
இப்பணியில் மாவட்ட அளவில் 521 கொசு ஒழிப்பு பணியாளர்கள் ஈடுபட்டுள்ளனர். இந்நிலையில், தமிழகத்தில் 1000 இடங்களில் காய்ச்சல் சிறப்பு முகாம் நடத்தப்படும் என்று சுகாதாரம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் அறிவித்தார்.
வேலூர் மாவட்டத்தில் நேற்று முதல் 21 கிராம பகுதிகள், 2 பேரூராட்சி பகுதிகள், 3 மாநகராட்சி பகுதிகள் உள்பட 24 இடங்களில் காய்ச்சல் முகாம்கள் தினமும் நடைபெறும் என அறிவிக்கப்பட்டுள்ளது.
அதன்படி, கன்னியம்பாடி ஒன்றியம், பெருமுகை, சதுப்பேரி, வேலூர் ஒன்றியத்தில் பெரிய செக்கானூர், முகமதுபுரம், ஆசனாம்பட்டு, சேதுவளை, குப்பத்தாமேட்டூர், வஞ்சூர், திருவலத்தில் கோக்கேரி, வடுகன்தாங்கல் வேப்பனேரி, கண்டையன்பள்ளி, கல்லப்பாடி ஆகிய 3 இடங்களில் காய்ச்சல் கண்டறியும் முகாம், வெள்ளூர் மாநகராட்சியில் சிறப்பு முகாம் தொடங்கப்பட்டது.
நேற்று அரசு பெண்கள் மேல்நிலைப்பள்ளி, கொசப்பேட்டை ஈவெரா பெண்கள் மேல்நிலைப்பள்ளி, ஆர்.என்.பாளையம் அரசு முஸ்லிம் மேல்நிலைப்பள்ளி உட்பட மொத்தம் 24 இடங்களில் காய்ச்சல் கண்டறியும் சிறப்பு முகாம் நேற்று தொடங்கியது.
இதில் கலந்து கொண்ட பொதுமக்களுக்கு பரிசோதனை செய்யப்பட்டு மருந்து, மாத்திரைகள் வழங்கப்பட்டன.
