தேன்கனி கோட்டை: தேன்கனி கோட்டை அருகே அடவிசாமிபுரம் கிராமத்தில் கடந்த 2 ஆண்டுகளாக மக்களை மிரட்டி வந்த சிறுத்தைப்புலி கூண்டில் சிக்கியது. கிருஷ்ணகிரி மாவட்டம், தேன்கனி கோட்டை அருகே உள்ள அடவிசாமிபுரம் மதனகிரி முனீஸ்வரன் கோவில் அருகே சனத்குமார் ஆறு ஓடுகிறது. கடந்தாண்டு போதிய மழை பெய்யாததால், ஆறு வறண்டு, புதர்க்காடாக மாறியது.
இந்நிலையில் ஆற்றின் கரையோரம் உள்ள மலைப்பாதையில் கடந்த 2 ஆண்டுகளாக பாறை பள்ளங்களில் பதுங்கியிருந்த சிறுத்தைப்புலி, மேய்ச்சலுக்கு சென்ற 15-க்கும் மேற்பட்ட ஆடுகளை கொன்று குவித்துள்ளது. இதனால் அடவிசாமிபுரம், தண்டரை, பஞ்சேஸ்வரம், இஸ்லாம்பூர், பென்னாங்கூர், ஆலேநத்தம் உள்ளிட்ட கிராம மக்கள் அச்சத்தில் இருந்தனர். இதையடுத்து சிறுத்தை நடமாட்டத்தை கண்காணிக்க வனத்துறையினர் கண்காணிப்பு கேமரா பொருத்தினர். பின்னர், பலமுறை அப்பகுதியில் கூண்டு வைத்து பிடிக்க முயன்றனர்.
ஆனால் சிறுத்தை கூண்டில் சிக்காமல் தப்பியது. மேலும் தனியார் பண்ணையில் உள்ள ஓட்டல் கழிவுகளை சாப்பிட வந்த நாய்களையும் கடித்து தின்றுவிட்டு அப்பகுதியில் முகாமிட்டுள்ளது. இந்நிலையில், கடந்த வாரம் தேவராஜ் என்ற நபர் மேய்ச்சலில் ஈடுபட்டிருந்த செம்மரம் ஒன்றை சிறுத்தைப்புலி கடித்துள்ளது. இதை பார்த்த அங்கிருந்தவர்கள் கூச்சலிட்டு ஆட்டை தப்பியோடினர்.
தேன்கனிக்கோட்டை வனச்சரக அலுவலகம் முன் ஆடு உயிருக்கு போராடியதை தொடர்ந்து மாவட்ட வன உயிரின காப்பாளர் ஜெகதீஸ் பாகர் சிறுத்தையை பிடிக்க நடவடிக்கை எடுத்தார். இந்நிலையில் நேற்று அதிகாலை 3 மணியளவில் கூண்டில் அடைக்கப்பட்ட ஆட்டை சாப்பிட வந்த சிறுத்தைப்புலி உள்ளே சிக்கியது. சம்பவ இடத்திற்கு விரைந்து வந்த வனத்துறையினர் சிறுத்தையை கூண்டுடன் ராட்சத வாகனத்தில் பொக்லைன் மூலம் அய்யூர் வனப்பகுதிக்கு கொண்டு சென்றனர்.
சிறுத்தை பிடிபட்டதால் அங்கிருந்த 30-க்கும் மேற்பட்ட கிராம மக்கள் நிம்மதி அடைந்தனர். இதுகுறித்து மாவட்ட வன உயிரின காப்பாளர் ஜெகதீஷ் பாகர் கூறுகையில், “பிடிபட்ட சிறுத்தை ஆண் சிறுத்தை. 4 முதல் 6 வயதுடையது. இந்த சிறுத்தையை அடர்ந்த வனப்பகுதியில் விட நடவடிக்கை எடுக்கப்படும்” என்றார்.
