சென்னை: சென்னை மாவட்டத்தில் 16 சட்டமன்ற தொகுதிகள் உள்ளன. இந்த தொகுதிகளில் அக்டோபர் 29-ம் தேதி முதல் நவம்பர் 28-ம் தேதி வரை வாக்காளர் பட்டியல் திருத்தும் பணி மேற்கொள்ளப்பட்டது.பின்னர் இறுதி வாக்காளர் பட்டியல் தயாரிக்கப்பட்டது. மாவட்ட தேர்தல் அலுவலர் ஜெ.குமரகுருபரன் ரிப்பன் மாளிகையில் நேற்று வெளியிட்டார்.
அங்கீகரிக்கப்பட்ட அரசியல் கட்சிகளிடம் பட்டியலை ஒப்படைத்தார். பின்னர் செய்தியாளர்களிடம் அவர் கூறியதாவது:- சென்னையில் வாக்காளர் எண்ணிக்கை 40 லட்சத்து 15 ஆயிரத்து 878 ஆக உயர்ந்துள்ளது. ஆண் வாக்காளர்கள் 19,70,279, பெண் வாக்காளர்கள் 20,44,323, மூன்றாம் பாலினத்தவர் 1,276. அக்டோபர் 29-ம் தேதி வெளியிடப்பட்ட வரைவு வாக்காளர் பட்டியலை ஒப்பிடும் போது, சென்னையில் 63,380 வாக்காளர்கள் அதிகரித்துள்ளனர்.
துறைமுகம் தொகுதியில் குறைந்தபட்சம் 1,78,980 வாக்காளர்களும், அதிகபட்சமாக வேளச்சேரி தொகுதியில் 3,16,642 வாக்காளர்களும் உள்ளனர். வாக்காளர் பட்டியல் திருத்தப் பணியில் பெயர் சேர்க்கக் கோரி 96,504 பேர் மனு தாக்கல் செய்திருந்தனர். அவர்கள் மீது உரிய உத்தரவு பிறப்பிக்கப்பட்டு, 96,184 வாக்காளர்களின் பெயர்கள் சேர்க்கப்பட்டுள்ளன. வாக்குச் சாவடி நிலை அலுவலர்களின் கள ஆய்வின்போது, வாக்காளர் பட்டியலில் இடம் பெயர்ந்தவர்கள், இறந்தவர்கள், ஒன்றுக்கு மேற்பட்ட வாக்காளர்கள் பெயர்கள் உள்ளிட்ட பெயர்களை நீக்கக் கோரி 32,964 மனுக்கள் பெறப்பட்டு, 32,804 பேர் உள்ளனர்.
திமுக மாநில சட்டத்துறை துணை செயலாளர் கே.சந்துரு, அதிமுக முன்னாள் அமைச்சர் டி.ஜெயக்குமார், பாஜக மாநில செயலாளர் கராத்தே தியாகராஜன், காங்கிரஸ் கட்சியின் எஸ்.கே. நவாஸ் உள்ளிட்டோர் இந்நிகழ்வில் கலந்து கொண்டு இறுதி வாக்காளர் பட்டியலை பெற்றுக்கொண்டனர். கூடுதல் மாவட்ட தேர்தல் அலுவலர்கள் எம்.பிரதிவிராஜ், கட்டா ரவிதேஜா, மாவட்ட வருவாய் அலுவலர் (தேர்தல்) பி.சுரேஷ், அங்கீகரிக்கப்பட்ட அரசியல் கட்சிகளின் பிரதிநிதிகள் மற்றும் நிர்வாகிகள் கலந்து கொண்டனர்.
