செங்கல்பட்டு மேற்கு மாவட்டம், தாம்பரம் மாநகராட்சி மண்டலம்-3க்கு உட்பட்ட அஸ்தினாபுரம் பகுதியில் அடிப்படை வசதிகள் இல்லாமையால் பொதுமக்கள் கடும் அவலத்தில் வாழ்கின்றனர். குடிநீர், சாலைகள், சுகாதாரம் உள்ளிட்ட அத்தியாவசிய தேவைகள் பூர்த்தியாகாத நிலையில், மக்கள் தினமும் புகார்களை தெரிவித்தும், நிர்வாகம் முறையாக செயல்படவில்லை என்பதே தெளிவாகிறது. இதனையடுத்து, தாம்பரம் மாநகராட்சிக்கு எதிராக அதிமுக, இன்று மாலை கண்டன ஆர்ப்பாட்டம் நடத்துகிறது.
2025-26ம் ஆண்டுக்கான மாநகராட்சி பட்ஜெட்டில் பல்வேறு மக்கள் நலத் திட்டங்கள் அறிவிக்கப்பட்டன. இதில், கால்நடை பவுண்ட், ரோபோட்டிக் வகுப்பு, மகளிர் பூங்கா, அறிவியல் பூங்கா, ஸ்மார்ட் சாலை திட்டம், குடிநீர் வசதிக்காக கோடிக் கணக்கில் நிதி ஒதுக்கீடு செய்யப்பட்டிருந்தாலும், நடைமுறை அமலாக்கத்தில் பெரும்பாலான திட்டங்கள் நிலைத்திலையே உள்ளன. எதிர்க்கட்சி இது குறித்து கடும் விமர்சனம் செய்துள்ளது. குறிப்பாக, துப்புரவு பணிக்கூளிகள் தேவையான உபகரணங்களின்றி செயல்படுகிறார்கள் என்றும், தாம்பரம் நகராட்சி செயலற்ற நிலையில்தான் இருப்பதாகவும் சாடப்பட்டுள்ளது.
புத்தேரி பகுதியில் கழிவுநீர் கலப்பு நிலத்தடி நீரைப் பாதித்துள்ளது. மக்கள் தோல் நோய்கள் உள்ளிட்ட சுகாதார பிரச்சனைகளால் பாதிக்கப்படுகிறார்கள். நெமிலிச்சேரி ஏரி மீண்டும் கழிவுநீரால் பாதிக்கப்படுகிறது. பாதாள சாக்கடை திட்டங்கள் முறையாக நடக்காததால், சாலைகளில் கழிவுநீர் ஓடுகிறது. சிற்றுந்து சேவைகள் குறைந்ததால் ஏழை மக்களுக்கு கடும் சிரமம் ஏற்பட்டுள்ளது. தகன மேடைகளின் பாதுகாப்பும் கவலைக்குரியதாகவே உள்ளது.
இந்த நிலைமைகளை கட்டாயம் சுட்டிக்காட்ட வேண்டும் என்பதற்காக, அதிமுக பொதுச்செயலாளர் எடப்பாடி பழனிசாமியின் அறிவிப்பின் பேரில், செங்கல்பட்டு மேற்கு மாவட்ட அதிமுக சார்பில், ஜமீன் ராயப்பேட்டையில் இன்று மாலை ஆர்ப்பாட்டம் நடக்கிறது. இது மக்கள் விரல்நீட்டும் பிரச்சனைகளை தீர்க்கும் வகையில் திமுக ஆட்சியையும் மாநகராட்சி நிர்வாகத்தையும் கட்டாயம் விழிப்பிக்க வேண்டும் என்பதற்கான முக்கிய அழைப்பாக அமைகிறது.
