சென்னை விமான நிலையத்தில் பரபரப்பை ஏற்படுத்திய புரட்சி தமிழகம் கட்சி தலைவர் ஏர்போர்ட் மூர்த்தி மீது எழும்பூர் குற்றவியல் நீதிமன்றம் 22ஆம் தேதி வரை நீதிமன்றக் காவல் உத்தரவிட்டுள்ளது.
சம்பவம் என்னவெனில், சென்னை டிஜிபி அலுவலகம் முன்பு விடுதலைச் சிறுத்தைகள் கட்சியினரும், ஏர்போர்ட் மூர்த்தி தரப்பினரும் இடையே மோதல் வெடித்தது. திருமாவளவனை குறித்து அவதூறு பேசப்பட்டதாகக் கூறி விசிகவினர் மூர்த்தியை தாக்கினர். அதற்குப் பதிலடி கொடுக்கும்போது, மூர்த்தி வைத்திருந்த பாக்கெட் கத்தியால் விசிக நிர்வாகி திலீபனின் கையில் காயம் ஏற்பட்டது. அவருக்கு 16 தையல்கள் போடப்பட்டது.
இதையடுத்து, இருதரப்பினரும் போலீசில் புகார் அளித்தனர். விசிக தரப்பில் தாக்குதல், காயப்படுத்துதல் குற்றச்சாட்டில் மூர்த்தி மீது வழக்கு பதிவு செய்யப்பட்டது. அதேபோல், மூர்த்தி அளித்த புகாரின் பேரில் விசிகவினர் மீது தாக்குதல் வழக்குகளும் பதிவு செய்யப்பட்டது.
மூர்த்தியை மெரினா போலீசார் கைது செய்து நீதிமன்றத்தில் ஆஜர்படுத்தினர். வழக்கை விசாரித்த எழும்பூர் குற்றவியல் நீதிமன்றம், அவரை செப்டம்பர் 22 வரை சிறையில் அடைக்க உத்தரவிட்டது. இதனால், சென்னை அரசியலிலும், காவல் துறையிலும் பெரும் பரபரப்பு நிலவுகிறது.
