சென்னை: சென்னையில் மழைநீர் மற்றும் வெள்ள நீரை சேமித்து குடிநீராக பயன்படுத்த இந்த நீர்த்தேக்கம் உதவும். சென்னையின் அதிகரித்து வரும் மக்கள்தொகையுடன், அடிப்படை குடிநீர் தேவையும் அதிகரித்து வருகிறது. தற்போதைய சூழலில், சென்னையில் தினமும் 1100 மில்லியன் லிட்டர் குடிநீர் வழங்கப்படுகிறது. இதில், 350 மில்லியன் லிட்டர் குடிநீர் உப்புநீக்கும் ஆலைகள் மூலம் பெறப்படுகிறது. மீதமுள்ள தண்ணீர் ஏரிகளில் இருந்து எடுக்கப்பட்டு விநியோகிக்கப்படுகிறது.
மக்கள் தொகை தொடர்ந்து அதிகரித்து வருவதால், 2035-ம் ஆண்டுக்குள் நீர் தேவை 2523 மில்லியன் லிட்டர் ஆகவும், 2050-ம் ஆண்டுக்குள் 3756 மில்லியன் லிட்டர் ஆகவும் அதிகரிக்கும் என்று மதிப்பிடப்பட்டுள்ளது. இதை நிவர்த்தி செய்ய, தமிழக அரசு புதிய நீர்த்தேக்கத்தை கட்ட முடிவு செய்துள்ளது. இந்த சூழ்நிலையில், கடந்த மார்ச் மாதம் சமர்ப்பிக்கப்பட்ட தமிழக பட்ஜெட்டில், “சென்னையின் மக்கள் தொகை வளர்ச்சி மற்றும் காலநிலை மாற்றம் காரணமாக அவ்வப்போது ஏற்படும் குடிநீர் பற்றாக்குறையைப் போக்க புதிய நீர்த்தேக்கம் கட்டுவது அவசியம்.
அந்த வகையில், சென்னை அருகே உள்ள கோவளம் துணைப் படுகையின் பருவகால வெள்ள நீரில் ஒரு பகுதியை, திருப்போரூர் தாலுகாவில் உள்ள பழைய மகாபலிபுரம் சாலைக்கும் கிழக்கு கடற்கரை சாலைக்கும் இடையில், 4375 ஏக்கர் பரப்பளவில், 1.6 டிஎம்சி கொள்ளளவிலும், ஆண்டுக்கு 2.25 டிஎம்சி வெள்ள நீரை சேமிக்கும் திறன் கொண்டதாகவும், ரூ. 350 கோடி செலவில் கட்டப்படும் என்று அறிவிக்கப்பட்டது.
இந்த அறிவிப்பின்படி, நீர்த்தேக்கத்தின் கட்டுமானப் பணிகளை மேற்கொள்ள நீர்வளத் துறை சுற்றுச்சூழல் அனுமதிக்கு விண்ணப்பித்துள்ளது. இந்த நீர்த்தேக்கத்தின் செலவு தற்போது ரூ. 471 கோடி என மதிப்பிடப்பட்டுள்ளது. ஆண்டுதோறும் கிடைக்கும் 170 எம்எல்டி குடிநீரைக் கொண்டு சென்னைவாசிகளின் குடிநீர் தேவையைப் பூர்த்தி செய்ய திட்டமிடப்பட்டுள்ளது.
