சென்னை: இது குறித்து தேர்வுகள் இயக்குநர் என். லதா வெளியிட்டுள்ள அறிவிப்பு:- பிளஸ் 2 வகுப்புக்கான உடனடி துணைத் தேர்வு ஜூன் 25 முதல் ஜூலை 2 வரை நடைபெறும். இந்தத் தேர்வை எழுத ஆர்வமுள்ள தனித் தேர்வர்கள் மற்றும் பள்ளி மாணவர்களிடமிருந்து விண்ணப்பங்கள் வரவேற்கப்படுகின்றன. மே 14 முதல் 29 வரை பள்ளி மாணவர்கள் அந்தந்தப் பள்ளிகளுக்குச் சென்று விண்ணப்பிக்க வேண்டும். தனித் தேர்வர்கள் கல்வி மாவட்டத்தில் உள்ள அரசு சேவை மையங்களுக்குச் சென்று தேர்வுக் கட்டணத்தைச் செலுத்தி தங்கள் விண்ணப்பத்தைப் பதிவு செய்ய வேண்டும்.
விண்ணப்பிக்கத் தவறியவர்கள் மே 30 மற்றும் 31 ஆகிய தேதிகளில் தட்கல் திட்டத்தின் மூலம் விண்ணப்பிக்கலாம். அதற்காக கூடுதலாக தேர்வுக் கட்டணத்துடன் கூடுதலாக ரூ. 1,000 ரூபாய் செலுத்த வேண்டும். அரசு மற்றும் அரசு உதவி பெறும் பள்ளி மாணவர்கள் இந்தக் கட்டணத்தைச் செலுத்த வேண்டியதில்லை. விரிவான தேர்வு அட்டவணை, கல்வி மாவட்ட வாரியாக அமைக்கப்பட்டுள்ள சேவை மையங்கள், விண்ணப்ப நடைமுறைகள் உள்ளிட்ட கூடுதல் விவரங்களை www.dge.tn.gov.in என்ற இணையதளத்தில் மாணவர்கள் அறிந்து கொள்ளலாம்.
விண்ணப்பிக்கும் போது வழங்கப்பட்ட ஒப்புகைச் சீட்டை மாணவர்கள் வைத்திருக்க வேண்டும். அதில் குறிப்பிடப்பட்டுள்ள விண்ணப்ப எண்ணைப் பயன்படுத்தி மட்டுமே ஹால் டிக்கெட்டை பதிவிறக்கம் செய்ய முடியும். இவ்வாறு அதில் கூறப்பட்டுள்ளது. பிளஸ் 2 பொதுத் தேர்வில் வெற்றி பெறும் வாய்ப்பை இழந்த மாணவர்களின் தொடர்பு எண்களுக்கு முதல்வர் ஸ்டாலின் சார்பாக குறுஞ்செய்தி அனுப்பப்பட்டுள்ளது.
அதில், ‘பொதுத் தேர்வில் தேர்ச்சி பெறாத மாணவர்கள், மனம் தளராதீர்கள். உடனடியாக துணைத் தேர்வில் பங்கேற்று வெற்றி பெறுங்கள். நீங்களும் உயர்கல்வி பெற்று வாழ்க்கையில் வெற்றி பெறுவீர்கள். அதற்கான வாய்ப்புகளை தமிழக அரசு உறுதி செய்யும் – தமிழக முதல்வர்’ என்று கூறப்பட்டுள்ளது. அதேபோல், தேர்ச்சி பெற்ற 7.47 லட்சம் மாணவர்களின் பெற்றோரின் செல்போன் எண்களுக்கு முதல்வர் ஸ்டாலினின் குரல் பதிவு அனுப்பப்பட்டுள்ளது. “குழந்தைகளை உயர்கல்வியில் சேர்க்க வேண்டும்” என்று முதல்வர் பதிவில் தெரிவித்துள்ளார்.
