சென்னை: தமிழக அமைச்சரவையில் மூத்த அமைச்சராகவும், திமுக பொதுச் செயலாளராகவும் இருக்கும் துரைமுருகன், 2006-11 வரை திமுக ஆட்சிக் காலத்தில் பொதுப்பணித் துறை அமைச்சராகப் பணியாற்றினார். 2011-ம் ஆண்டு, அதிமுக ஆட்சிக் காலத்தில் துரைமுருகன் மற்றும் அவரது மனைவி சாந்தகுமாரி ஆகியோர் மீது 2007-09 வரையிலான காலகட்டத்தில் வருமானத்திற்கு அதிகமாக ரூ.1.40 கோடி சொத்துக்களைக் குவித்ததாக ஊழல் தடுப்புத் துறை போலீசார் வழக்குப் பதிவு செய்தனர்.
ஊழல் தடுப்புத் துறை மேல்முறையீடு: வழக்கில் இருந்து விடுவிக்க வேண்டும் என்ற அவர்களின் கோரிக்கையை ஏற்று, வேலூர் முதன்மை அமர்வு நீதிமன்றம் 2017-ம் ஆண்டு இருவரையும் விடுதலை செய்ய உத்தரவிட்டது. இதை எதிர்த்து, வேலூர் ஊழல் தடுப்புத் துறை டிஎஸ்பி சார்பில் உயர் நீதிமன்றத்தில் மேல்முறையீடு செய்யப்பட்டது. வழக்கை விசாரித்த உயர் நீதிமன்றம், சொத்து குவிப்பு வழக்கில் இருந்து துரை முருகன் மற்றும் சாந்தகுமாரி இருவரையும் விடுவித்து வேலூர் நீதிமன்றம் பிறப்பித்த உத்தரவை ரத்து செய்து, சிறப்பு நீதிமன்றம் வழக்கை மீண்டும் விசாரித்து 6 மாதங்களுக்குள் முடிக்க உத்தரவிட்டது.
அதன்படி, வழக்கு வேலூரில் இருந்து சென்னையில் உள்ள 10-வது ஊழல் தடுப்பு கூடுதல் சிறப்பு நீதிமன்றத்திற்கு மாற்றப்பட்டு விசாரணை நடைபெற்று வருகிறது. இந்த நிலையில், இந்த வழக்கு கடந்த மாதம் சிறப்பு நீதிமன்றத்தில் நீதிபதி இ.பக்தவச்சலு முன் விசாரணைக்கு வந்தபோது, அவர்கள் இருவரும் ஆஜராகாததால், இருவருக்கும் கைது வாரண்ட் பிறப்பித்து நீதிபதி உத்தரவிட்டார். இதற்கிடையில், வழக்கை வேலூருக்கு மாற்றவும், எலும்பு முறிவு காரணமாக துரைமுருகனுக்கு நேரில் ஆஜராவதிலிருந்து விலக்கு அளிக்கவும் தாக்கல் செய்யப்பட்ட மனுவை விசாரித்த உயர் நீதிமன்றம், செப்டம்பர் 3-ம் தேதி விசாரணைக்கு நேரில் ஆஜராவதிலிருந்து விலக்கு அளித்து உத்தரவு பிறப்பித்தது.
இந்நிலையில், சிறப்பு நீதிமன்றத்தில் நீதிபதி இ.பக்தவச்சலு முன்பு நேற்று மீண்டும் வழக்கு விசாரணைக்கு வந்தது. அப்போது, துரைமுருகன் நேரில் ஆஜராகவில்லை. அவரது மனைவி சாந்தகுமாரி மட்டும் ஆஜரானதால், கைது வாரண்ட் திரும்பப் பெறப்பட்டது. ஆனால், அமைச்சர் துரைமுருகன் நேரில் ஆஜராகாததால், அவர் ஆஜராகவில்லை என்றால், கைது வாரண்டை நிறைவேற்றுமாறு போலீசாருக்கு நீதிபதி உத்தரவிட்டுள்ளார்.
