வேலைநிறுத்தத்தில் ஈடுபட்ட ஆசிரியர்கள் மீதான அனைத்து நடவடிக்கைகளும் ரத்து..!!

முந்தைய அதிமுக ஆட்சியின் போது, ​​பல்வேறு கோரிக்கைகளை வலியுறுத்தி, அரசு ஊழியர்கள் மற்றும் ஆசிரியர் கூட்டமைப்பு JACTO-GEO சார்பில் தொடர் போராட்டங்கள் நடத்தப்பட்டன. அவற்றில் பங்கேற்ற ஆசிரியர்கள் மீது பல்வேறு நடவடிக்கைகள் எடுக்கப்பட்டன. இதற்கிடையில், திமுக அரசு பொறுப்பேற்றதும், அரசு ஊழியர்கள் மற்றும் ஆசிரியர்கள் மீதான நடவடிக்கைகள் ரத்து செய்யப்படும் என்று முதல்வர் மு.க. ஸ்டாலின் உத்தரவிட்டார்.

இருப்பினும், சில ஆசிரியர்கள் மீது எடுக்கப்பட்ட ஒழுங்கு நடவடிக்கைகள் இன்னும் நிலுவையில் உள்ளன. இது தொடர்பாக, பள்ளிக் கல்வித் துறை செயலாளர் பி. சந்திரமோகன் அனைத்து இயக்குநர்களுக்கும் அனுப்பிய சுற்றறிக்கையில் கூறப்பட்டுள்ளதாவது:- 2019-ம் ஆண்டு நடைபெற்ற JACTO-GEO போராட்டத்தின் போது ஒரு வழக்கு பதிவு செய்யப்பட்டு, இதுவரை முதல் தகவல் அறிக்கை பெறப்பட்டு, நிலுவையில் உள்ள குற்றச்சாட்டுகளிலிருந்து அவர்களை விடுவிக்க உத்தரவு பிறப்பிக்கப்பட்டுள்ளது. முதலமைச்சரின் அறிவிப்பைத் தொடர்ந்து, 2016, 2017 மற்றும் 2019-ம் ஆண்டுகளில் நடைபெற்ற ஆசிரியர்களின் வேலைநிறுத்தப் போராட்ட நாட்கள் பணிக்காலங்களாக முறைப்படுத்தப்படுகின்றன.

அதனுடன் தொடர்புடைய தற்காலிக இடைநீக்கக் காலமும் பணிக்காலமாக ஏற்றுக்கொள்ளப்படுகிறது. அந்த வேலைநிறுத்தப் போராட்டங்கள் காரணமாக ஆசிரியர்கள் மீது எடுக்கப்பட்ட அனைத்து ஒழுங்கு நடவடிக்கைகளும் குற்றவியல் வழக்குகளும் கைவிடப்படுகின்றன. எனவே, பதவி உயர்வுக்கு ஏதேனும் பாதிப்பு ஏற்பட்டால், அதை சரிசெய்ய சம்பந்தப்பட்ட அதிகாரிகள் உரிய நடவடிக்கை எடுக்க வேண்டும். போராட்டத்தின் போது இடமாற்றம் செய்யப்பட்ட ஆசிரியர்களை மீண்டும் அதே இடத்தில் பணியமர்த்த வேண்டும். அதன்படி, பொது இடமாற்ற கலந்தாய்வின் போது அவர்களுக்கு உரிய முன்னுரிமை வழங்கப்படும். இவ்வாறு அதில் கூறப்பட்டுள்ளது.