சென்னை: தமிழக முதல்வர் மு.க.ஸ்டாலின் ஜூலை 22 மற்றும் 23 ஆகிய தேதிகளில் கோவை மற்றும் திருப்பூர் மாவட்டங்களுக்கு அரசு பணிக்காகப் பயணம் மேற்கொள்ள உள்ளார். மாவட்டங்களில் நடைபெறும் பல்வேறு நிகழ்ச்சிகளில் பங்கேற்கும் வகையில் முதல்வரின் வருகைக்கான ஏற்பாடுகள் தீவிரமாக நடைபெற்று வருகின்றன. இந்தப் பயணத்தின் ஒரு பகுதியாக அவர் அரசு திட்டங்களை திறந்து வைக்கவும், புதிய வளர்ச்சி திட்டங்களுக்கு அடிக்கல் நாட்டவும் உள்ளார்.
22ஆம் தேதி காலை சென்னையிலிருந்து விமானம் மூலம் கோவை வருகிறார். விமான நிலையத்தில் வரவேற்பு ஏற்பாடுகளுக்குப் பிறகு, திருப்பூர் மாவட்டம் பல்லடம் மற்றும் உடுமலைப்பேட்டை பகுதிகளுக்கு காரில் பயணிக்கிறார். அந்த நாளில் அவர் கோவில்வழி பேருந்து நிலையம் மற்றும் வேலம்பாளையத்தில் புதிய அரசு மருத்துவமனை ஆகியவற்றை திறந்து வைக்க உள்ளார். மேலும், உடுமலைப்பேட்டையில் பெரியார், அண்ணா மற்றும் அம்பேத்கர் சிலைகளையும் திறக்கவுள்ளார்.
23ஆம் தேதி பொள்ளாச்சியில் உள்ள நீர்வளத்துறை அலுவலக வளாகத்தில், பரம்பிக்குளம் ஆழியார் திட்டத்தின் முன்னோடிகள் காமராஜர், சுப்பிரமணியன் மற்றும் மகாலிங்கம் ஆகியோரின் சிலைகளை திறந்து வைக்கிறார். இதனைத் தொடர்ந்து, உடுமலை நேதாஜி மைதானத்தில் நடைபெறும் அரசு விழாவில் கலந்து கொண்டு நலத்திட்ட உதவிகளை வழங்குகிறார். திட்டப்பணிகள் தொடக்க நிகழ்ச்சிகளிலும் பங்கேற்பதுடன், திருப்பூர், உடுமலைப்பேட்டை மற்றும் மடத்துக்குளம் ஆகிய இடங்களில் ரோடு ஷோவிலும் கலந்துகொள்கிறார்.
இந்த பயணத்தின் இறுதிக் கட்டமாக, கோவையில் நடைபெறும் “மாஸ்டர் பிளான் 2041” ஆலோசனைக் கூட்டத்தில் முதல்வர் பங்கேற்கிறார். இதில் அரசு அதிகாரிகள், பொதுமக்கள், தொழில்துறை நிபுணர்கள் மற்றும் மக்களின் பிரதிநிதிகள் பங்கேற்க உள்ளனர். மாவட்ட வருகையை முன்னிட்டு பாதுகாப்பு ஏற்பாடுகள் கடுமையாக அமைக்கப்பட்டுள்ளன. ட்ரோன் மற்றும் ரிமோட் இயங்கும் வான்வெளி சாதனங்களை இயக்க தடை விதிக்கப்பட்டுள்ளது.
