சென்னையில் நடந்த மனதை வருடும் சம்பவமாக, நியூரோசர்ஜன் மருத்துவர் ஒருவர் வந்தே பாரத் ரயிலில் தவறவிட்ட வாட்ச் சில மணி நேரங்களுக்குள் அவரிடம் திரும்பி வந்தது. எழும்பூர் நிலையத்திலிருந்து வீட்டிற்கு சென்ற பிறகு தான் வாட்ச் ரயிலில் மறந்துவிட்டது நினைவுக்கு வந்த அந்த மருத்துவர், உடனடியாக RailMadad இணையதளத்தின் மூலம் புகார் அளித்தார். அவரது புகாருக்கு சில நிமிடங்களில் பதில் வந்ததோடு, ரயில்வே போலீசார் துரிதமாக செயல்பட்டு பொருளை தேடத் தொடங்கினர்.
மதியம் 12.28 மணிக்கு அளிக்கப்பட்ட புகாருக்கு வெறும் மூன்று நிமிடங்களில் ரயில்வே உதவி எண்ணிலிருந்து அழைப்பு வந்தது. அதன் பிறகு வெறும் 21 நிமிடங்களில், ரயில்வே போலீசார் வாட்ச் புகைப்படத்தை அனுப்பி உறுதிப்படுத்தினர். அந்த வாட்ச் ரயிலில் இருந்து மீட்கப்பட்டதை அறிந்த மருத்துவர், ரயில்வே ஊழியர்களின் விழிப்புணர்வையும் அர்ப்பணிப்பையும் கண்டு நெகிழ்ந்தார். அவர் தனது எக்ஸ் தளத்தில் (முன்னர் ட்விட்டர்) இதை பகிர்ந்து பாராட்டினார்.
அந்த மருத்துவர் கூறுகையில், “வாட்சை தவறவிட்டது என் தவறு. ஆனால் ரயில்வே ஊழியர்கள் எந்த குற்றமுமின்றி இரவோடு இரவாக உழைத்து அதை மீட்டனர். இது அவர்களின் பணிப்பற்று மற்றும் மனிதநேயம் காட்டுகிறது,” என தெரிவித்துள்ளார். மறுநாள் காலை தேவையான ஆவணங்களுடன் ரயில் நிலையத்திற்குச் சென்று வாட்சை பெற்றுக்கொண்ட அவர், ரயில்வே ஊழியர்களின் சேவையை பாராட்டினார்.
இந்த சம்பவம் சமூக வலைதளங்களில் பெரிதும் பாராட்டைப் பெற்றுள்ளது. பொதுமக்கள், ரயில்வே ஊழியர்களின் நேர்மையும், பணிப்பற்றும், சேவை மனப்பான்மையும் இன்றைய சமுதாயத்தில் நம்பிக்கையை உருவாக்குவதாக கருத்து தெரிவித்துள்ளனர். வந்தே பாரத் ரயிலில் நடந்த இந்த நிகழ்வு, பயணிகளிடம் ரயில்வேயின் நம்பிக்கையை மேலும் உயர்த்தியுள்ளது.
