சென்னை: அதிகரித்து வரும் மின் தேவையை சமாளிக்க, 660 மெகாவாட் திறன் கொண்ட எண்ணூர் அனல் மின் விரிவாக்க திட்டத்தை செயல்படுத்த, மின் வாரியம் திட்டமிட்டுள்ளது. இதுகுறித்து, மின் வாரிய அதிகாரிகள் கூறியதாவது:- தமிழகத்தில், ஆண்டுதோறும், 10 சதவீதம் மின் தேவை அதிகரித்து வருகிறது. அதன்படி, அதிகரித்து வரும் மின்தேவையை சமாளிக்க, மின்வாரியம் பல்வேறு நடவடிக்கைகளை எடுத்து வருகிறது.சொந்த உற்பத்தியை தவிர்த்து, மத்திய அரசு மற்றும் தனியார் நிறுவனங்களிடம் இருந்து, மின்சாரம் கொள்முதல் செய்யப்படுகிறது.
இருப்பினும், சொந்த உற்பத்தியை அதிகரிக்க, மின்சார வாரியம் தீவிர நடவடிக்கை எடுத்துள்ளது. அதன்படி, 660 மெகாவாட் திறன் கொண்ட எண்ணூர் அனல் மின் விரிவாக்கத் திட்டம் செயல்படுத்தப்பட உள்ளது. இத்திட்டத்தை செயல்படுத்த ஏற்கனவே தனியார் நிறுவனத்திற்கு ஒப்பந்தம் 2014-ல் வழங்கப்பட்டது. ஆனால், அந்த நிறுவனம் திட்டத்தை செயல்படுத்துவதில் தாமதம் ஏற்பட்டதால், 2018-ல் ஒப்பந்தம் ரத்து செய்யப்பட்டது.
பின்னர், மீதமுள்ள பணிகளை மேற்கொள்ள 2022-ல் மற்றொரு நிறுவனத்திற்கு ரூ. 4,442 கோடி ரூபாய் வழங்கப்பட்டது. ஆனால், அந்த நிறுவனம் திட்டத்தை செயல்படுத்துவதில் தாமதம் ஏற்பட்டதால், அந்த நிறுவனத்துக்கு வழங்கப்பட்ட ஒப்பந்தம் கடந்த ஆண்டு ரத்து செய்யப்பட்டது. இந்நிலையில், 660 மெகாவாட் திறன் கொண்ட எண்ணூர் அனல் மின் விரிவாக்க திட்டத்தை, மின் வாரியமே செயல்படுத்த உள்ளது.
“இதற்கான, சாத்தியக்கூறு அறிக்கை தயாரிக்கும் பணி நடந்து வருகிறது. இந்த அறிக்கை தயாரானதும், அடுத்த கட்ட பணிகள் துவங்கும். தற்போது, 4,320 மெகாவாட் அனல் மின்சாரம் தயாரிக்க, மின் வாரியத்திற்கு சொந்தமாக உற்பத்தி நிலையம் உள்ளது,’ என, அதிகாரிகள் தெரிவித்தனர்.
